Dr. Reddy’s Laboratories Ltd kompaniyasining O‘zbekistondagi vakolatxonasidan olingan rasmiy ma’lumotga asosan, «Telsartan H» 80 mg/12,5 mg dori vositasining ayrim seriyasi bozor muomalasidan qaytarib olinmoqda. Bu haqda Farmatsevtika mahsulotlari xavfsizligi markazi ma’lum qildi.
Xususan, «Telsartan H» preparatining C2501976 seriyasida faol modda – gidroxlorotiazid miqdori belgilangan me’yorlardan chetga chiqqani aniqlangan. Mazkur holat dori vositasining sifat ko‘rsatkichlariga oid nomuvofiqlik sifatida baholangan. Shu bilan birga, O‘zbekiston hududida muomalaga kiritilgan C2501977 seriyasida bunday nomuvofiqlik qayd etilmagan.
Biroq C2501977 seriyasi ham nomuvofiqlik aniqlangan seriya bilan bir xil ishlab chiqarish lotiga mansub faol modda asosida tayyorlangani sababli, ehtimoliy xavflarning oldini olish maqsadida profilaktik chora sifatida bozordan qaytarib olinmoqda. Ushbu qaror dori vositalari muomalasi xavfsizligini ta’minlashga qaratilgani ta’kidlandi.
Mutasaddilar mazkur seriyadagi «Telsartan H» 80 mg/12,5 mg preparatini xarid qilgan fuqarolardan uni iste’mol qilmaslikni, zarurat tug‘ilganda esa davolovchi shifokor bilan maslahatlashgan holda muqobil dori vositasini tanlashni so‘ramoqda. Farmatsevtika mahsulotlari xavfsizligi markazi aholiga dori vositalaridan foydalanishda faqat rasmiy va ishonchli manbalarga tayanish, shifokor tavsiyasisiz dori qabul qilmaslik hamda tasdiqlanmagan xabarlarga ishonmaslikni yana bir bor eslatdi.
Avvalroq «Kursiv» nashri Nestle O‘zbekistondagi ayrim bolalar ozuqasini ixtiyoriy qaytarib olayotgani haqida yozgandi.
