Kazakhmys kompaniyasida qancha mis zaxirasi qolgan

Inbusiness.kz nashrining yozishicha, Qozog‘istonning yaqinda sotilgan Kazakhmys kompaniyasi hali ham katta miqdordagi mis zaxiralariga ega.

Nashrga ko‘ra, u yerdagi mis zaxirasi jami 47,4 million tonnani tashkil etadi. 2020-yilda ommaviy axborot vositalari Kazakhmys Barlau’ga tayanib, Kazakhmys’ning tasdiqlangan mis zaxiralari 762 million tonnani tashkil etgani, bu juda katta ko‘rsatkich ekanini yozgandi. Qidiruv kompaniyasi rahbari Galim Nurjanovning so‘zlariga ko‘ra, 2030-yilga borib mis zaxiralari 5 million tonnaga ko‘payishi kutilmoqda.

Shu bilan birga, 2021-yilda Kazakhmys kompaniyasi raisining birinchi o‘rinbosari Andrey Gaidin Qozog‘istonning mis zaxiralari 2025-yilga kelib 10 million tonnagacha ko‘payishini bashorat qilgan edi, aftidan u qisman Kazakhmys aktivlariga ishora qilgan. 2024-yilning iyun oyida mis korporatsiyasining sobiq rahbari Nurahmet Nuriyev jurnalistlarga 2058-yilgacha iqtisodiy jihatdan qazib olinishi mumkin bo‘lgan tijorat rudasi borligini aytgandi. Ikki yil oldin, Mustaqil Yerosti boyliklari mutaxassislari professional assotsiatsiyasi (PONEN) rahbari Georgiy Freyman Kazakhmys zaxiralarini KAZRC’da qayta baholash rejalashtirilganini ma’lum qilgandi.

So‘nggi besh yil ichida Kazakhmys 151 million tonnadan ortiq ruda qazib oldi. Korporatsiya veb-saytiga ko‘ra, 2025-yilda u 243 ming tonna konsentratdagi mis va 363 ming tonna katodli mis ishlab chiqargan.

Avvalroq ”Kursiv” Qozog‘istonning yirik mis ishlab chiqaruvchisi Kazakhmys’ni sotib olishni moliyalashtirish uchun Shveysariyaning Mercuria Energy Group Ltd. kompaniyasi $1,2 milliardlik bitim imzolagani haqida yozgandi.

Shuningdek, mis narxi birinchi marta $13 mingga yetgani haqida xabar berilgandi.