«Katta xakerlik» («The Great Hack») 2019-yilda suratga olingan hujjatli film bo‘lib, u zamonaviy dunyoda ma’lumot (data) qanday qilib eng kuchli qurolga aylanganini ochib beradi.
Film markazida Facebook bilan bog‘liq yirik ma’lumotlar mojarosi va Cambridge Analytica kompaniyasining faoliyati turadi. Asar tomoshabinni raqamli texnologiyalar ortida yashiringan xavfli haqiqatlar bilan yuzlashtiradi.
Film AQShda 2016-yilda bo‘lib o‘tgan prezidentlik saylovlari fonida rivojlanadi. Unda millionlab foydalanuvchilarning shaxsiy ma’lumotlari ularning roziligisiz yig‘ilgani va siyosiy reklama orqali odamlarning qarashlari, ovoz berish qarorlari qanday boshqarilgani yoritiladi. Shu orqali ijtimoiy tarmoqlar demokratiyaga qanchalik ta’sir ko‘rsata olishi ochib beriladi.
Asarda uchta asosiy qahramon hikoyasi orqali voqealar bayon qilinadi: ma’lumotlar olimi, jurnalist va sobiq Cambridge Analytica xodimi. Ularning har biri turli yo‘llar bilan haqiqatni ochishga harakat qiladi va katta tizimga qarshi kurashadi.
Film global miqyosda ma’lumotlar qanday yig‘ilayotgani, kimlar tomonidan va nima maqsadda ishlatilayotgani haqida savollar qo‘yadi. Tomoshabin shaxsiy ma’lumotlar aslida kimga tegishli ekani va ularni himoya qilish qanchalik muhimligini anglay boshlaydi.
Eslatib o‘tamiz, avvalroq Kursiv Uzbekistan «Yovuzlik: yaxshilik uchun» filmi haqida ma’lumot bergandi.
