Xitoy Turkmanistonning yirik gaz konida qazib olishni kengaytirmoqchi
Xitoyning Milliy neft-gaz kompaniyasi (CNPC) Turkmanistonning ulkan «Galkinish» gaz konining To‘rtinchi bosqichi deb nomlangan sektorida ishlarni boshlashga tayyorgarlik ko‘rmoqda. Bu haqda Turkmaniston hukumatining hisobotida keltirilgan.
Ushbu sektor to‘liq quvvat bilan ishlay boshlagach, yiliga taxminan 30 milliard kubometr gaz ishlab chiqarishi kutilmoqda. To‘rtinchi bosqichni rivojlantirish uchun barcha mablag‘ni Turkmaniston taqdim etmoqda.
Ashxobod u yerdan chiqqan gazni qayerga jo‘natishni rejalashtirayotgani haqida hech qanday ma’lumot bermagan. Hukumat hisobotida Xitoy hozirda turkman gazining eng yirik xaridor ekani va yiliga taxminan 40 milliard kubometr gaz sotib olishi ta’kidlangan.
Unda, shuningdek, eksport yo‘nalishlarini diversifikatsiya qilish Turkmaniston gaz siyosatining asosi bo‘lib qolmoqda deya ta’kidlanadi va yana bir eksport varianti — yillik quvvati 33 milliard kubometrni tashkil etadigan TAPI (Turkmaniston-Afg‘oniston-Pokiston-Hindiston) nomi bilan tanilgan Transafg‘on quvuri loyihasi haqida so‘z boradi. Afg‘onistonda TAPI qurilishi sekin davom etmoqda.
So‘nggi oylarda Turkmaniston rasmiylari uzoq vaqtdan beri rejalashtirilgan Transkaspiy quvurini qurishga qiziqish bildirdi, bu esa 2025-yilda jami 320 milliard kubometr gaz iste’mol qilgan Yevropa Ittifoqiga katta hajmdagi gaz eksport qilish imkoniyatini oshiradi.
«Ushbu ulkan konning muvaffaqiyatli bosqichma-bosqich o‘zlashtirilishi Turkmanistonga ham ichki, ham xalqaro bozorlarga tabiiy gaz yetkazib berishni ishonchli ta’minlash imkonini beradi», — deyiladi xabarda.
«Galkinish» koni yettita rivojlanish sektoriga yoki bosqichlariga bo‘lingan. Bugungi kunga qadar faqat CNPC tomonidan ishlab chiqilgan birinchi bosqich ishlamoqda va yiliga taxminan 30 milliard kubometr gaz ishlab chiqaradi. Ikkinchi va uchinchi bosqichlarni rivojlantirish bo‘yicha CNPC va Abu Dabining National Oil Co. bilan muzokaralar davom etmoqda.
Mustaqil tahlilchilarning hisob-kitoblariga ko‘ra, «Galkinish» konida, yaqin atrofdagi «Garako‘l» va «Yashlar» konlarida 27,4 trillion kubometr tabiiy gaz mavjud bo‘lib, bu o‘nlab yillar davomida yillik 200 milliard kubometr gaz eksportini ta’minlash uchun yetarli hajmdir.
Avvalroq «Kursiv» Rossiyadagi «Gazprom» kompaniyasining O‘zbekiston, Qozog‘iston va Qirg‘izistonga gaz yetkazib berish hajmi 2025-yilda 22,2 foizga oshgani haqida yozgandi.
