Xiaomi Android 15 va Android 16 asosidagi HyperOS 3.0 ning barqaror versiyasini chiqarishda davom etmoqda, ammo barcha smartfonlar ham ushbu beta versiyada yangilana olmaydi. Bu haqda XiaomiTime ma’lumot berdi.
Unga ko‘ra, ba’zi modellar, dastlabki sinovlarda ishtirok etganiga qaramay, operatsion tizimning oldingi versiyalarida qolishi mumkin.
So‘nggi bir necha oy ichida HyperOS 3.0 flagmanlardan tortib budjet modellarigacha bo‘lgan ko‘pgina mos keladigan qurilmalarga o‘rnatildi. Biroq ba’zi smartfonlar uchun yangilanish jarayoni amalda to‘xtab qoldi. Masalan, Xiaomi 13 Lite, POCO F5 va POCO F5 Pro ikki oydan ortiq vaqt davomida yangi sinov versiyalarini olmagan. Xiaomi 13T hali ham ichki alfa sinovdan o‘tkazilmoqda.
Xitoy bozori uchun mo‘ljallangan modellar bilan ham shunga o‘xshash holat kuzatilmoqda. Xiaomi Civi 2, Redmi Note 12 Turbo, Redmi Note 12T Pro va Redmi K60 modellarida HyperOS 3.0’ning beta versiyalari yo‘q. Bu ushbu qurilmalar barqaror OT yangilanishi uchun yakuniy ro‘yxatga kiritilmasligini ko‘rsatishi mumkin.
HyperOS 3.0’ni olmaydigan smartfonlar uchun Android 15 ga yangilanish rejalashtirilgan bo‘lib, u bilan birga bir qator tizim yaxshilanishlari va SI funksiyalari ham mavjud. Xiaomi hali ushbu yangilanishlarning vaqti yoki formati haqida rasmiy ma’lumot bermadi.
Avvalroq «Kursiv» Xiaomi kompaniyasi o‘zining uchta asosiy ishlanmasini protsessor, operatsion tizim va sun’iy intellektni birlashtirgan smartfon ustida ish olib borayotgani haqida yozgandi.
