Dongfeng Nissan o‘rta o‘lchamdagi SUV segmenti uchun mo‘ljallangan yangi Nissan NX8 modelini rasman namoyish qildi.
NX8 dizayni Nissan’ning yangilangan V-motion uslubida ishlangan. Model sanoatdagi eng uzun 2,4 metrli uzluksiz yoritilgan old chiroqlar, yoritiluvchi tekis logotip va matritsali faralar bilan ajralib turadi. Orqa qismida esa 2 064 ta OLED elementdan iborat fonarlar o‘rnatilgan bo‘lib, ularni sozlanadigan yoritish effektlari bilan boshqarish mumkin.
Texnologiyalar borasida NX8 LiDAR tizimi, aqlli haydovchi yordamchilari, jumladan yuqori tezlik va shahar harakati uchun mo‘ljallangan NOA funksiyasi hamda avtomatik parkovka tizimi bilan jihozlangan.
Salonida markaziy va yo‘lovchi uchun ikki ekranga ega raqamli panel hamda proyeksion displey mavjud. Bu haydovchi uchun zamonaviy va yuqori texnologik muhit yaratadi.
Nissan NX8 ikki xil versiyada taqdim etiladi. Kengaytirilgan yurish masofasiga ega modifikatsiyada 1.5T turbomotor o‘rnatilgan bo‘lib, uning quvvati 109 kVtni tashkil etadi. Elektr dvigatel esa 195 kVt quvvat ishlab chiqaradi. Ushbu versiya sof elektr rejimida 102 km va 185 km masofani bosib o‘ta oladi.
To‘liq elektr NX8 esa 215 kVt yoki 250 kVt quvvatga ega elektromotor bilan taklif etiladi. Model 800 voltli yuqori kuchlanishli platforma va CATL’ning yangi avlod LFP batareyalari bilan jihozlangan. 5C tezkor quvvatlash texnologiyasi qo‘llanadi. Elektromobilning yurish masofasi 565–580 km va 630–650 km variantlarda bo‘ladi. Eng yuqori tezlik 180 km/soatni tashkil etadi.
Nissan NX8 jamoatchilikka yilning birinchi yarmida namoyish etilishi rejalashtirilgan. Model 800V platforma va 5C ultra tezkor quvvatlashni birlashtirgan xorijiy brenddagi ilk NEV SUV bo‘lishi bilan ajralib turadi.
Eslatib o‘tamiz, Kursiv Uzbekistan nashri Nissan LEAF ayollar orasida eng yaxshi ixcham avtomobil deb topilgani haqida yozgan edi.
