Osiyo taraqqiyot banki (OTB) va «Masdar» kompaniyasi Qashqadaryo viloyati Guzar shahrida yirik quyosh energetikasi loyihasini amalga oshirish uchun $30 mln miqdorida moliyalashtirish shartnomasini imzoladi.
Loyiha doirasida 300 megavatt quvvatga ega quyosh elektr stansiyasi hamda 75 megavatt-soat sig‘imdagi energiya saqlash tizimi (akkumulyator batareyalari) quriladi. Bundan tashqari, quyosh energiyasini milliy elektr tarmog‘iga ulash uchun 1,6 kilometr elektr uzatish liniyasi va 220 kilovoltlik podstansiya barpo etiladi.
Moliyalashtirishning $12,5 millioni OTB krediti, $12,5 millioni Osiyoda xususiy infratuzilmani rivojlantirish jamg‘armasi (LEAP 2) jamg‘armasi krediti va $5 millioni Kanada iqlim va tabiat jamg‘armasi (CANPA) hisobidan ajratiladi. Ushbu jamg‘armalarning barchasi OTB tomonidan boshqariladi.
Loyiha ishga tushirilgach, O‘zbekistonda yiliga qo‘shimcha 634 gigavatt-soat elektr energiyasi ishlab chiqarilishi va karbonat angidrid chiqindilari kamida 354 ming tonnaga kamayishi kutilmoqda. Bu mamlakatning 2030-yilgacha qayta tiklanuvchi energiya ulushini 40 foizga yetkazish maqsadiga xizmat qiladi.
Shuningdek, OTB loyiha uchun tashkil etilgan va to‘liq Masdarga tegishli kompaniyaga $9 milliongacha qisman kredit kafolatini taqdim etadi. Bu elektr energiyasi uchun to‘lovlar bilan bog‘liq xavflarni kamaytirishga yordam beradi.
Eslatib o‘tamiz, avvalroq mazkur loyiha uchun Yevropa tiklanish va taraqqiyot banki (YTTB) $195,5 mln miqdorida moliyalashtirish paketini shakllantirgandi.
