Ispaniyada ikki poyezd to‘qnashib ketdi, Tramp Mirziyoyevni Tinchlik kengashiga qo‘shilishga taklif qildi — 19-yanvarda e’lon qilingan muhim yangiliklar dayjesti

Ispaniyada ikki poyezd to‘qnashib ketdi, Tramp Mirziyoyevni Tinchlik kengashiga qo‘shilishga taklif qildi — 19-yanvarda e’lon qilingan muhim yangiliklar dayjesti Kursiv Uzbekistan materialida.

Tramp Mirziyoyevni Tinchlik kengashiga qo‘shilishga taklif qildi

Shavkat Mirziyoyev nomiga Donald Trampdan Yaqin Sharqda tinchlikni mustahkamlash va mojarolarni hal etishga qaratilgan xalqaro tashabbusga qo‘shilish bo‘yicha rasmiy taklif yuborildi. Bu haqda prezident matbuot xizmati xabar berdi.

Maktubda ushbu tashabbus 2025-yil 29-sentabrda e’lon qilingani, u jahon yetakchilari tomonidan qo‘llab-quvvatlangani hamda BMT Xavfsizlik Kengashining 2025-yil 17-noyabrdagi 2803-sonli rezolyutsiyasi bilan ma’qullangani qayd etilgan. Tashabbus G‘azodagi mojaroni tugatishga qaratilgan kompleks reja asosida ishlab chiqilgan.

Fond bozori: «Ipoteka-bank» aksiyalari bir haftada 82 foizga oshdi

«Toshkent» respublika fond birjasi (RFB)dan joy olgan yuqori likvidli aksiyalarning aksariyati 9-yanvardan 16-yanvargacha bo‘lgan davrda ijobiy dinamikani ko‘rsatib, UCI fond indeksi 3,43 foizga oshdi.

Ushbu davr mobaynida «Ipoteka-bank»ning oddiy aksiyalari eng katta o‘sishga erishib, 82,39 foizga qimmatlashdi. Shuningdek, «Aloqabank» (+43,18%) va «O‘zsanoatqurilishbank»ning oddiy (+40,31%) aksiyalarida ham o‘sish qayd etildi.

Sherzodxon Qudratxo‘ja: tahdidlar kuchaysa O‘zbekiston yadroviy bombacha qilishga harakat qilishi mumkin

O‘zJOKU rektori Sherzodxon Qudratxo‘ja global xavfsizlikdagi o‘zgarishlar va ehtimoliy tahdidlar sharoitida kuchli davlatlar ilm-fan va fundamental tadqiqotlarga tayanishini aytdi. Uning ta’kidlashicha, iqtisodiyoti va ilmiy bazasi yetarli bo‘lgan davlatlar, zarurat tug‘ilsa, xavfsizlik masalasida yadroviy choralar haqida ham o‘ylashga majbur bo‘ladi.

Samsung nosoz SSD uchun ikki barobar ko‘proq kompensatsiya to‘ladi

Samsung kompaniyasi nosoz SSD uchun mijozga qurilmaning dastlabki narxidan ancha yuqori miqdorda kompensatsiya to‘ladi. Bu haqda Sammobile xabar bermoqda. Foydalanuvchi AQShdagi Reddit platformasida xabar qoldirgan.

Gap 4 TB xotiraga ega Samsung 990 Pro SSD haqida ketmoqda. Qurilma xotira narxlari oshishidan oldin sotib olingan. Foydalanish jarayonida SSD beqaror ishlay boshlagan, keyinchalik esa butunlay ishdan chiqqan. Samsung texnik ko‘magi tekshiruvdan so‘ng qurilmani ta’mirlab bo‘lmasligini tasdiqlagan.

O‘zbekistonliklar uchun AQSh vizasini soddalashtirish bo‘yicha muzokaralar boshlandi

O‘zbekiston fuqarolari uchun Qo‘shma Shtatlar vizasini soddalashtirish bo‘yicha muzokaralar boshlangan. Bu haqda O‘zbekistonning Amerikadagi elchisi Furqat Siddiqov Daryo.uz’ga ma’lum qildi.

Elchining so‘zlariga ko‘ra, aholi uchun AQSh viza rejimini yengillashtirish borasida muntazam harakat ketmoqda. U kutilgan natijaga erishish esa oson kechmasligi tabiiy holat ekanini ta’kidlagan.

Sea Breeze Uzbekistan bo‘yicha jamoatchilik eshituvlari qachon bo‘lishi aytildi

Davlat ekologik ekspertizasi markazining ma’lum qilishicha, Sea Breeze Uzbekistan turistik majmuasi qurilishi loyihasi bo‘yicha atrof-muhitga ta’sirni baholash yuzasidan jamoatchilik eshituvi 2026-yil 23-yanvar kuni bo‘lib o‘tadi.

Loyiha Toshkent viloyatining Bo‘stonliq tumanida, Chorvoq suv omborining sharqiy qirg‘og‘i hududida joylashgan bo‘lib, zamonaviy turistik infratuzilmani barpo etishni nazarda tutadi. U 577 gektar maydonni va unga tutash 3000 gektar maydonni egallaydi. Unda dam olish maskanlari, suzish havzalari, sport maydonchalari, do‘konlar, xizmat ko‘rsatish markazlari, shuningdek, festivallar, konsertlar va konferensiyalar o‘tkaziladigan joylar bo‘ladi. Ikki qirg‘oq o‘rtasida ko‘prik ham quriladi.

Ispaniyada ikki poyezd to‘qnashib ketdi — qurbonlar bor

Ispaniyaning janubida ikki poyezd ishtirokida sodir bo‘lgan temiryo‘l halokati oqibatida kamida 21 kishi halok bo‘ldi, ko‘plab odamlar jarohat oldi. Bu haqda Reuters agentligi xabar berdi.

Voqea 2026-yil 18-yanvar kuni Kordoba viloyatidagi Adamuz shahri yaqinida yuz berdi. Malaga – Madrid yo‘nalishidagi yuqori tezlikdagi Iryo poyezdi relsdan chiqib, qo‘shni yo‘ldan kelayotgan Madrid – Uelva yo‘nalishidagi Renfe kompaniyasiga qarashli Alvia poyezdi bilan to‘qnashdi. Natijada ikkala poyezd ham relsdan chiqib ketdi.

Jahon bozorida neft narxi pasaydi

19-yanvar kuni jahon birjalarida neft narxi pasayishni boshladi. Bunga Erondagi fuqarolik tartibsizliklarining yumshashi va AQSh zaxiralarining oshishi sabab bo‘ldi. Bu haqda Reuters agentligi xabar bermoqda.

Ma’lumotiga ko‘ra, Brent markali neftning bir barreli narxi 28 sent (0,44 foiz)ga arzonlashib, $63,85 ni tashkil qildi. AQShning WTI (West Texas Intermediate) markasi esa fevral oyi fyucherslari bo‘yicha 36 sentga pasayib, $59,08 ga teng bo‘ldi.

Yevropa Ittifoqi AQSh bilan savdo kelishuvini to‘xtatmoqchi

Yevropa parlamenti deputatlari Bryussel va Vashington o‘rtasidagi transatlantik savdo kelishuvini tasdiqlashdan bosh tortishi mumkin. DW xabariga ko‘ra, bunga Donald Trampning Grenlandiya masalasida Yevropa mamlakatlariga nisbatan kutilmagan ultimatum qo‘ygani sabab bo‘ldi.

Yevroparlamentdagi eng yirik fraksiya Yevropa xalq partiyasi yetakchisi Manfred Veber X ijtimoiy tarmog‘ida ushbu qaror haqida ma’lum qildi. Uning so‘zlariga ko‘ra, siyosiy vaziyat barqarorlashmaguncha, kelishuvni ratifikatsiya qilish imkonsiz. Donald Tramp Grenlandiya oroli bo‘yicha o‘z qarashlarini qo‘llab-quvvatlamagan Yevropaning 8 ta davlatiga nisbatan 10 foizlik boj to‘lovlari joriy etish bilan tahdid qilgan.