Butun dunyo bo‘ylab milliarderlarning boyligi 2025-yilga kelib $2,5 trillionga oshib, yangi rekord ko‘rsatkichni qayd etdi. Bu haqda Oxfam xayriya tashkilotlari birlashmasining 19-yanvar kuni e’lon qilingan yillik hisobotida keltirilgan.
Hujjat Shveytsariyaning Davos shahrida bo‘lib o‘tadigan Jahon iqtisodiy forumi (WEF) boshlanishiga bag‘ishlangan. Tashkilotning hisob-kitoblariga ko‘ra, milliarderlarning umumiy boyligi 2020-yil mart oyidan beri 81 foizga o‘sib, $18,3 trillionga (15,8 trillion yevro) yetdi. Oxfam ta’kidlaganidek, sayyoradagi eng boy odam bo‘lgan Ilon Mask to‘rt soniyada global o‘rtacha yillik daromadga teng daromad oladi.
Bundan tashqari, hisobotda insoniyatning deyarli yarmi qashshoqlikda yashayotgani ko‘rsatilgan. Bu global boylikning atigi 0,52 foizini tashkil qiladi, o‘ta boy 1 foizga esa 43,8 foiz to‘g‘ri keladi.
«Biz milliarderlar davrida yashayapmiz va bu dunyo uchun yomon yangilik», — dedi Oxfam’ning Germaniya bo‘yicha prezidenti Sharlotta Bekker.
Uning so‘zlariga ko‘ra, super boylarning iqtisodiy qudrati siyosiy ta’sirga aylanayotgani juda xavotirli, bu esa demokratiyani puchga chiqaradi.
Bekkerning qo‘shimcha qilishicha, bu jarayon va uning butun dunyo uchun salbiy oqibatlari AQSh prezidenti Donald Tramp misolida yaqqol ko‘rinib turibdi, uning «boylarni qo‘llab-quvvatlovchi siyosati tengsizlikni kuchaytirmoqda».
Germaniya milliarderlar soni bo‘yicha dunyoda to‘rtinchi o‘rinda turadi va ularning soni 2025-yilda uchdan bir qismga ko‘payib, 172 taga yetdi.
Avvalroq «Kursiv» dunyo aholisining atigi 0,001 foizi boy odamlardan iboratligi hamda eng boy odamlar o‘z boyligini $2,2 trillionga oshirgani haqida yozgandi.
Shuningdek, dunyoning eng boy 10 nafar milliarderi aniqlangani, ular egalik qilayotgan kompaniyalar haqida xabar berilgandi.
