Har yili Shveysariyaning Davos shahrida o‘tkaziladigan Jahon iqtisodiy forumining amaldagi hamraisi, BlackRock investitsiya kompaniyasi rahbari Larri Fink tadbirni dunyoning boshqa shaharlariga ko‘chirish imkoniyatini ko‘rib chiqmoqda. Bu haqda Financial Times xabar berdi.
Finkning so‘zlariga ko‘ra, potensial mezbon shaharlar qatoriga Detroyt va Dublin, Jakarta va Buenos-Ayres kiradi.
Forum Davosda 1971-yildan beri o‘tkazib kelinmoqda. Shveysariyaning sharqidagi Alp tog‘larida, 1500 metrdan ortiq balandlikda joylashgan bu shahar chang‘i kurorti sifatida tanilgan. 2002-yilda forum 11-sentabr terroristik hujumlaridan keyin birdamlik belgisi sifatida bir yilga Nyu-Yorkka ko‘chirildi.
2026-yilda Jahon iqtisodiy forumi (WEF) 19-23-yanvar kunlari bo‘lib o‘tadi. Siyosat va biznes vakillari xalqaro xavfsizlik va iqtisodiy masalalarni muhokama qiladi. Tadbirning asosiy mavzusi «Muloqot ruhi» deya nomlangan.
Bu yil Shveysariyadagi forum rekord darajadagi 60 nafar davlat va hukumat rahbarlari hamda 55 vazirni jalb qilgan. Davosda global kompaniyalarning 800 dan ortiq yuqori lavozimli rahbarlari ishtirok etadi.
Avvalroq «Kursiv» global iqtisodiyotning bu yil 3,3 foizga va 2027-yilda 3,2 foizga o‘sishi taxmin qilinayotgani haqida yozgandi.
