«Buvilar» («Nonnas») 2025-yilda suratga olingan film bo‘lib, u real hayotdagi Jo Skaravella hikoyasiga asoslangan. Asar tomoshabinga oddiy, ammo iliq va samimiy voqeani taqdim etadi. Film markazida Nyu-York shahrida noodatiy restoran ochishga jur’at qilgan inson taqdiri turadi.
Jo Skaravella hayotida og‘ir davrni boshdan kechiradi va o‘ziga yangi ma’no izlay boshlaydi. Shu jarayonda u bolalik xotiralari va uy taomlarining inson ruhiga ta’sirini eslaydi. Natijada u restoran ochish g‘oyasiga keladi, biroq bu oddiy muassasa emas edi.
Restoranning asosiy jihati shundaki, unda ovqatlarni professional oshpazlar emas, balki mehribon buvilar tayyorlaydi. Har bir buvi o‘z oilasida avloddan avlodga o‘tib kelayotgan retseptlar asosida taom pishiradi. Bu taomlar nafaqat mazali, balki xotira va mehrga boy bo‘ladi.
Film davomida tomoshabin buvilar hayoti, ularning o‘tmishi va oshxona bilan bog‘liq xotiralari bilan tanishadi. Ular uchun bu restoran faqat ish joyi emas, balki o‘zini kerakli va foydali his qilish imkoni. Jo esa ular orqali hayotga bo‘lgan ishonchini qayta topadi.
Eslatib o‘tamiz, avvalroq Kursiv Uzbekistan «Bankir» — moliyaviy mustaqillikka intilganlar haqidagi filmni e’lon qilgandi.
