Mazda MX-5 Miata AQSh bozoridagi eng «keksa» sportkarga aylandi
AQSh avtomobil bozorida Mazda MX-5 Miata modeli bir avlod doirasida konveyerda eng uzoq qolgan yangi sportkar maqomini egalladi. 2016-yildan beri jiddiy o‘zgarishsiz ishlab chiqarilayotgan yapon rodsteri raqobatchilari bozorni tark etgach, ushbu ko‘rsatkich bo‘yicha yagona yetakchiga aylandi.
Yaqin vaqtgacha bu maqom «Godzilla» laqabli Nissan GT-R’ga tegishli edi, biroq 2024-yilda Nissan 17 yillik tarixga ega modelni ishlab chiqarishni to‘xtatdi. Shuningdek, Jaguar F-Type va Audi R8 modellarining tarixi yakunlangach, to‘qqiz yildan beri sotuvda bo‘lgan to‘rtinchi avlod Miata ro‘yxat boshiga chiqdi.
Mashina o‘zining texnik soddaligi va boshqaruv aniqligi bilan ajralib turadi. Kapot ostida joylashgan 2,0 litrli motor 181 ot kuchini taqdim etadi. Avtomobilning vazni bor-yo‘g‘i 1073 kg atrofida ekanligi hisobga olinsa, bu quvvat unga 100 km/soat tezlikka 5,7 soniyada chiqish imkonini beradi.
Bugungi kunda ushbu sportkarning bazaviy narxi $29,5 mingni tashkil etadi. Garchi avtomat uzatmalar qutisi mavjud bo‘lsa-da, bozor kuzatuvlariga ko‘ra, haqiqiy avtomobil ixlosmandlari uni asosan mexanik uzatmada xarid qilishni afzal ko‘rishmoqda.
Avvalroq Kursiv Uzbekistan Mazda 6e avtomobili nega ommalashayotgani haqida xabar bergan edi.
