Xiaomi kompaniyasi o‘zining shaxsiy transport vositalari qatorini yana bir yangi model Electric Scooter 6 Lite bilan boyitdi. Ushbu qurilma chidamli korpusi va yo‘l notekisliklarini bildiruvchi maxsus osmasi tizim bilan ajralib turadi.
Yangi samokat po‘latdan ishlangan mustahkam romga ega bo‘lib, unga 10 dyuymli havo bilan to‘ldirilgan shinalar o‘rnatilgan. Eng muhim yangiliklardan biri old qismdagi prujinali amortizatsiya tizimi bo‘lib, u notekis yo‘llarda harakatlanishni sezilarli darajada yumshatadi va haydovchiga qulaylik yaratadi.
Texnik xususiyatlariga ko‘ra, qurilma 500 vatt quvvatga ega motor bilan jihozlangan. Bu unga soatiga 25 km tezlikka erishish imkonini beradi. Bir marta quvvatlash orqali bosib o‘tiladigan maksimal masofa ham 25 kmni tashkil etadi. Samokatning umumiy suvdan himoyasi IPX4 standartiga, batareya himoyasi esa jiddiyroq — IPX6 darajasiga javob beradi.
Qurilmaning og‘irligi 18 kg bo‘lib, kompaniya ma’lumotiga ko‘ra, u 100 kggacha bo‘lgan haydovchini bemalol ko‘tara oladi. Shuningdek, Electric Scooter 6 Lite aqlli funksiyalardan xoli emas. Mi Home ilovasi orqali foydalanuvchi shinalardagi bosimni tekshirishi, yurish tarixini ko‘rishi va samokatni telefondan masofaviy bloklashi mumkin. Hozircha yangi modelning narxi e’lon qilinmagan
Avvalroq Kursiv Uzbekistan piyoda yo‘laklarida elektr samokatlarni tezligi soatiga 10 kmdan oshirish mumkin emasligi haqida xabar bergan edi.
