Chempionlar ligasining guruh bosqichi doirasida «Barselona» safarda Chexiyaning «Slaviya» klubi mehmoni bo‘ldi. Uchrashuvda kataloniyaliklar 2:4 hisobida g‘alaba qozondi.
Uchrashuv kutilmagan ssenariy ostida boshlandi. 10-daqiqada mezbonlar hujumchisi Vasil Kushey yaqin masofadan darvozani ishg‘ol qilib, «Slaviya»ni oldinga olib chiqdi. Biroq «Barselona» tezda o‘ziga keldi. 34-daqiqada Fermin Lopes hisobni tenglashtirgan bo‘lsa, oradan 8 daqiqa o‘tib, u o‘zining ikkinchi goli dubl bilan jamoasini oldinga olib chiqdi.
Birinchi bo‘lim yakunlanishi arafasida Robert Levandovski kutilmaganda to‘pni o‘z darvozasiga kiritib qo‘ydi va jamoalar tanaffusga 2:2 hisobi bilan chiqib ketishdi. Ikkinchi bo‘limda Xansi Flik o‘yinni kuchaytirishga qaror qildi. Zaxiradan maydonga tushgan Dani Olmo va angliyalik hujumchi Markus Reshford o‘yin taqdirini hal qilishdi.
63-daqiqada Olmo jarima maydoni tashqarisidan ajoyib zarba yo‘llab, hisobni 3:2 ko‘rinishiga keltirdi. 70-daqiqada esa Reshfordning uzatmasidan so‘ng Robert Levandovski o‘z xatosini to‘g‘rilab, raqib darvozasiga to‘rtinchi golni kiritdi.
Ushbu mag‘lubiyatdan so‘ng «Slaviya» musobaqani muddatidan oldin tark etdi. «Barselona» esa turnir jadvalida 9-o‘ringa ko‘tarildi. Kuchli sakkizlikka kirish va pley-offga to‘g‘ridan to‘g‘ri yo‘llanma olish uchun jamoa kelasi chorshanba kuni o‘z uyida «Kopengagen»ni mag‘lub etishi kerak bo‘ladi.
Avvalroq Kursiv Uzbekistan «Barselona» finalda «Real»ni mag‘lub etib, Ispaniya Superkubogini qo‘lga kiritgani haqida xabar bergan edi.
