Qozog‘istonda 2025-yilda Geely avtomobillari savdosi bo‘yicha rasmiy statistika e’lon qilindi. Bu haqda «Kitayskie avtomobili» nashri ma’lum qildi.
Eng ommabop model budjetli sedan Geely Emgrand bo‘lib, yil davomida jami 3398 dona sotilgan. Ushbu avtomobilning narxi qo‘shni mamlakatda 7,29 mln tengedan ($14,6 ming atrofida) boshlanadi.
Ikkinchi o‘rinda kompakt shahar krossoveri Geely Coolray joylashgan bo‘lib, uning 3259 dona nusxasi sotilgan. Bu Coolray’ning ikkinchi avlodi bo‘lib, Rossiyada taqdim etilgan Belgee X50’dan farq qiladi. Avtomobil narxi 9,69 million tengedan ($19,3 ming atrofida) boshlanadi.
Uchinchi o‘rinni Geely Atlas egallagan, yil davomida u 1597 dona sotilgan. Bu modelning narxi 11,29 mln tengedan ($22,6 ming atrofida) boshlanadi.
2025-yil yakuniga ko‘ra, Geely Qozog‘istonda yangi avtomobillar savdosida TOP-10 ga kirgan, ammo faqat o‘ninchi o‘rinni egallagan.
Eslatib o‘tamiz, avvalroq Geely Galaxy V900 gibrid miniveni Xitoyda sotuvga chiqarilishi haqida xabar bergan edik.
