Tramp Kanadaga 100 foizlik boj bilan tahdid qildi

AQSh prezidenti Donald Tramp Kanadaga nisbatan og‘ir savdo choralari qo‘llashi mumkinligini ma’lum qildi. Bu haqda Reuters agentligi xabar berdi.

Trampning so‘zlariga ko‘ra, agar Kanada Xitoy bilan savdo kelishuvi tuzsa, u darhol Kanadadan AQShga kiradigan barcha mahsulotlarga 100 foiz boj tarifini joriy qiladi. Tramp Kanadani Xitoy tomonidan to‘liq iqtisodiy egallanish xavfi kutayotganini ta’kidladi va Kanadaning bizneslari, ijtimoiy tizimi hamda yashash tarziga zarar yetishi mumkinligi haqida ogohlantirdi.

Kanada bosh vaziri Mark Karney esa mahalliy mahsulotlarni xarid qilishni targ‘ib qilmoqda, ammo Trampning boj tarif tahdidini bevosita tilga olmadi. Karneyning ta’kidlashicha, Kanada iqtisodiyotni himoya qilish va o‘z mahsulotlariga ustuvorlik berish yo‘lini tanlagan, boshqa davlatlarning qarorlarini nazorat qilish esa imkoniyat doirasida emas.

Karney bu oy Xitoyga safar qilib, ikki davlat o‘rtasidagi tarang munosabatlarni yumshatishga harakat qilgan va Xitoy bilan savdo kelishuvi imzolagan. Safardan so‘ng Tramp dastlab Karneyni qo‘llab-quvvatlagan va Xitoy bilan kelishuv tuzishni ma’qullagan edi.

Davosdagi Jahon iqtisodiy forumida Karney global tartib o‘zgarganini va o‘rta kuchlar birlashishi kerakligini aytgan. Shu munosabat bilan Tramp Kanadani AQSh tufayli yashaydi deb ta’riflagan. Bu esa Karney tomonidan rad etilgan. Karneyning ta’kidlashicha, Kanada AQSh tufayli emas, o‘z kuchi va resurslari tufayli rivojlanadi.

Eslatib o‘tamiz, avvalroq Tramp JPMorgan banki va bosh direktoridan 5 milliard dollar da’vo qilgani haqida xabar bergan edik.