O‘zbekistonda 5 grammli oltin quyma narxi ilk bor 11 mln so‘mga yaqinlashmoqda. Markaziy bank 29-yanvar Toshkent vaqti bilan soat 09:51 holatiga oltin quymalarini sotish va sotib olish narxlarini e’lon qildi.
Xususan, 5 grammli oltin quymaning narxi 10,291 mln so‘mdan 10,864 mln so‘mga oshdi. Uni qaytarib sotib olish narxi esa qadog‘i but holatda 9,796 mln so‘mdan 10,243 mln so‘mga, talablarga mos kelmaydigan holatda 9,698 mln so‘mdan 10,140 mln so‘mga ko‘tarildi.
Quyida oltin quymalarining grammlariga nisbatan sotish va sotib olish narxlari keltirilgan:
| Og‘irligi | Sotish narxi | Qaytarib sotib olish (qadog‘i but) | Qaytarib sotib olish (qadog‘i buzilgan yoki texnik talablarga mos emas) |
|---|---|---|---|
| 5 gramm | 10 864 000 so‘m | 10 243 000 so‘m | 10 140 000 so‘m |
| 10 gramm | 21 728 000 so‘m | 20 486 000 so‘m | 20 279 000 so‘m |
| 20 gramm | 43 456 000 so‘m | 40 972 000 so‘m | 40 558 000 so‘m |
| 50 gramm | 108 639 000 so‘m | 102 431 000 so‘m | 101 396 000 so‘m |
| 100 gramm | 217 278 000 so‘m | 204 862 000 so‘m | 202 792 000 so‘m |
Shu bilan birga, Markaziy bank xalqaro qimmatbaho metallar bozori konyunkturasidan kelib chiqib, narxlar kun davomida qayta ko‘rib chiqilishi mumkinligini qo‘shimcha qildi.
Jahon bozorida oltin narxi tarixiy rekordni qayd etishni davom etmoqda. 29-yanvar kuni Toshkent vaqti bilan soat 10:02 holatiga oltin narxi bir unsiya uchun $5 556 ni tashkil qildi. Mutaxassislar fikricha, oltin narxining oshishi, asosan, AQSh dollari bilan kuchli teskari bog‘liqlik bilan izohlanadi.
Eslatib o‘tamiz, avvalroq Kursiv Uzbekistan oltinni qanday qilib onlayn sotib olish mumkinligi haqida ma’lumot bergandi.
