Hyundai kompaniyasi Hyundai Santa Cruz pikapini muddatidan oldin ishlab chiqarishdan chiqaradi. Bu haqda Motor1 nashri ma’lum qildi.
Dastlab model 2027-yil o‘rtalarigacha konveyerda qolishi ko‘zda tutilgan edi. Qarorning asosiy sababi sotuvlarning keskin pasayishi bo‘ldi. AQSh bozorida 2023-yilda taxminan 36,6 ming dona sotilgan bo‘lsa, 2025-yil yakunida talab 29 foizga kamayib, 25,5 ming donaga tushdi. Shu davrda bevosita raqib Ford Maverick 155 ming dona bilan Santa Cruzni qariyb olti baravar ortda qoldirdi.
Hyundai rasmiy bayonotida Santa Cruz o‘z missiyasini bajargani qayd etildi. Kompaniya pikap bozorini tark etmaydi va yangi, kuchli loyiha ustida ishlamoqda.
Rejalarga ko‘ra, 2030-yilga borib Santa Cruz o‘rnini to‘liq ramali o‘rta o‘lchamli pikap egallaydi. U Ford Ranger va Chevrolet Colorado bilan raqobatlasha olishi kutilmoqda. Yangi model ishlab chiqarishi 2029-yilda boshlanishi mumkin.
Eslatib o‘tamiz, Kursiv Uzbekistan nashri Hyundai Staria Camper avtomobili taqdim etilgani haqida yozgan edi.
