Toshkentda Isroil gemmologiya markazining filiali ochildi

Toshkentda zargarlik buyumlari, qimmatbaho toshlar va olmoslarni sertifikatlashga ixtisoslashtirilgan «GCI Gemological Centers Uzbekistan» gemmologiya markazi tashkil etildi. Bu haqda «Dunyo» AA ma’lum qildi.

Markaz Isroildagi elchixonaning ko‘magi bilan 2025-yil avgust oyida Tel-Avivda «GCI Gemological Centers Ltd.» va O‘zbekistonning «Expert One» MCHJ o‘rtasida tuzilgan shartnoma asosida tashkil etildi. Bosh ofisi Tel-Avivda joylashgan kompaniya qimmatbaho toshlarni ekspertizadan o‘tkazish, baholash va sertifikatlash bo‘yicha xizmat ko‘rsatadi hamda gemmologiya sohasida mutaxassislar tayyorlaydi.

Toshkent filialining ochilish marosimida Isroil elchisi Gideon Lustig, «New Uzbekistan» O‘zbekiston – Isroil savdo-investitsiya uyi prezidenti Nargiza Qodirova va kompaniya vakillari ishtirok etdi. Markaz gemologik tadqiqotlar o‘tkazish, xalqaro «GCI» sertifikatlarini berish va sanoat mutaxassislari uchun ta’lim dasturlarini amalga oshiradi. Shu bilan u Markaziy Osiyodagi birinchi va dunyodagi uchinchi filialga aylandi.

Eslatib o‘tamiz, avvalroq Fransiya «Gustave Roussy» brendi ostida Toshkentda onkologiya markazi ochishi haqida xabar bergan edik.