Ilon Mask kosmosda SI ma’lumotlar markazi qurmoqchi

Ilon Mask xAI va SpaceX kompaniyalarini birlashtirish orqali kosmosda ma’lumot markazlari yaratish tashabbusini ilgari surmoqda. Ushbu loyiha sun’iy yo‘ldoshlar, raketalar va SI tizimlarini birlashtirib, ma’lumotlarni Yer sathidan tashqarida qayta ishlash imkonini beradi.

SpaceX AQSh Federal aloqa komissiyasiga quyosh energiyasi bilan ishlovchi orbital ma’lumot markazlari sifatida xizmat qiladigan sun’iy yo‘ldoshlarni uchirish ruxsatini so‘ragan. Loyihaning dastlabki prototipi 2027-yilda kosmosga uchirilishi rejalashtirilgan.

Kosmosdagi ma’lumot markazlari Yer yuzidagi markazlarga nisbatan arzonroq bo‘lishi mumkin, chunki ular doimiy quyosh energiyasidan foydalanadi va issiqlikni bevosita kosmosga chiqarish imkoniga ega. Shu bilan birga, loyihaning texnik qiyinchiliklari mavjud: radiatsiya, kosmik chiqindilar, issiqlikni boshqarish, kechikish va yuqori texnik xizmat xarajatlari.

Kosmosdagi SI chiplarini sovutish muhim masala hisoblanadi. Kosmos sovuq bo‘lsa-da, u deyarli vakuum, shuning uchun issiqlikni Yer yuzidagi kabi olib chiqib bo‘lmaydi. Kuchli chiplar issiqlikni infraqizil energiya sifatida chiqaradigan radiatorlarga uzatadi, bu esa loyihaning hajmi, og‘irligi va xarajatlarini oshiradi.

Eslatib o‘tamiz, avvalroq Jeff Bezos TeraWave nomli yangi sun’iy yo‘ldosh internet loyihasini taqdim etgan edi.