Oppo kompaniyasi yangi flagman smartfoni Find X10 Pro uchun ikki 200-megapikselli sensorli kamera tizimini joriy qilishi mumkin. Bu haqda Weibo ma’lum qildi.
Digital Chat Station insayderining ma’lumotlariga ko‘ra, kompaniya ushbu tizimni yangi modelida sinovdan o‘tkazmoqda. Ikkala sensorning optik formati 1/1,3 dyuymni tashkil etadi. Hozircha bu sensorlar bir xil bo‘lishi yoki yo‘qligi ma’lum emas.
Taqqoslash uchun, avvalgi Find X9 Pro modeli asosiy 50 MP kamera va 200 MP «telefoto» kameraga ega bo‘lib, ularning optik formatlari mos ravishda 1/1,28 va 1/1,56 dyuymni tashkil etadi. Shuningdek, Vivo X200 Ultra modeli ham shunga o‘xshash konfiguratsiyani taklif qilgan, ammo «telefoto» sensori biroz kattaroq (1/1,4 dyuym) bo‘lgan.
Eslatib o‘tamiz, avvalroq Oppo Find X9s smartfoni kuchli kamera bilan taqdim etilishi haqida xabar bergan edik.
