«Ta’sischi» («The Founder», 2016) mashhur McDonald’s qanday yaratilgani va uning ortida qanday murakkab, bahsli jarayonlar yotganini ochib beruvchi dramatik film. Kartina real voqealarga asoslangan bo‘lib, dunyodagi eng yirik tezkor ovqatlanish tarmoqlaridan birining paydo bo‘lish tarixini tomoshabinga boshqacha rakursdan ko‘rsatadi.
Film markazida Rey Krok oddiy savdogar, lekin cheksiz ambitsiya va qat’iyatga ega inson turadi. U aka-uka MakDonaldlarning kichikkina, ammo juda samarali ishlaydigan restoran tizimini kashf etib, unda ulkan biznes imkoniyatini ko‘radi. Reyning orzusi bu g‘oyani butun Amerika, keyinchalik esa butun dunyo bo‘ylab yoyish.
Asarda tadbirkorlik ruhi bilan birga axloqiy dilemmalar ham chuqur yoritiladi. Rey Krok muvaffaqiyat sari intilar ekan, halollik, hamkorlik va sadoqat masalalarida murakkab qarorlar qabul qiladi.
Kartinada 1950-yillar Amerika muhiti, iste’mol madaniyati va tadbirkorlik ruhiyati aniq hamda ishonarli tarzda aks ettirilgan. Aktyorlik ijrosi, ayniqsa, Rey Krok obrazining ichki ziddiyatlari filmga alohida chuqurlik bag‘ishlaydi.
Eslatib o‘tamiz, avvalroq Kursiv Uzbekistan «Merlin» seriali aktyorlari bugun qanday ko‘rinishda ekani haqida ma’lumot bergandi.
