5-fevral sanasi dunyo madaniyati durdonasi bo‘lgan muzeyning ochilishi va haligacha topilmagan yadro quroli siri bilan tarixda qolgan. Kursiv Uzbekistan kunning eng muhim voqealarini xronologik tartibda taqdim etadi.
1852-yilda Sankt-Peterburgda imperator Nikolay I tashabbusi bilan Ermitaj muzeyi keng jamoatchilik uchun o‘z eshiklarini ochdi. Bugungi kunda ushbu majmua 3 milliondan ortiq eksponatni, jumladan, Leonardo da Vinchi, Rafael va Rembrandt kabi buyuk rassomlarning nodir asarlarini o‘z ichiga olgan dunyodagi eng yirik madaniy markazlardan biri hisoblanadi.
Fransiyada 1878-yili taniqli sanoatchi va Citroën avtomobilsozlik konserni asoschisi Andre Sitroen dunyoga keldi. U Yevropa avtomobil sanoatida birinchilardan bo‘lib Genri Fordning konveyer usulini joriy qilgan va arzon hamda sifatli mashinalar ishlab chiqarishni yo‘lga qo‘yib, «Yevropaning Fordi» nomini olgan edi.
AQSh tarixidagi sirli hodisalardan biri 1958-yilda yuz berdi. Harbiy havo kuchlariga tegishli B-47 bombardimonchi samolyoti havoda qiruvchi samolyot bilan to‘qnashib ketgach, Jorjiya shtati qirg‘oqlari yaqinida bortidagi «Mark 15» vodorod bombasini tashlab yuborishga majbur bo‘ldi. Dengiz qa’riga g‘arq bo‘lgan ushbu yadroviy qurol ko‘plab qidiruv ishlariga qaramay topilmagan.
Portugaliyaning Madeyra orolida 1985-yili zamonaviy futbol afsonasi Krishtianu Ronaldu tavallud topdi. Besh karra «Oltin to‘p» sohibi, Chempionlar ligasining eng yaxshi to‘purari va Yevropa chempioni bo‘lgan hujumchi o‘zining professionalizmi hamda sermahsul o‘yini bilan sport tarixidagi eng buyuk atletlardan biriga aylandi.
Oradan yetti yil o‘tib, 1992-yilda Braziliyada yana bir futbol yulduzi Neymar da Silva Santos Junior dunyoga keldi. Texnik mahorati va kreativ o‘yin uslubi bilan tanilgan futbolchi 2017-yilda «Barselona»dan «PSJ»ga rekord darajadagi $222 mln evaziga o‘tib, futbol tarixidagi eng qimmat transferga aylangan edi.
Avvalroq Kursiv Uzbekistan 4-fevral sanasida sodir bo‘lgan muhim hodisalar haqida xabar bergan edi.
