Hafta davomida texnologiya kompaniyalari bir qator yangi qurilmalarni taqdim etdi. Smartfonlar, planshetlar va gadjetlar bozoridagi haftaning eng muhim yangiliklari bilan Kursiv Uzbekistan’ning ushbu texnodayjestida tanishing.
Samsung Galaxy A07 5G
Samsung kompaniyasi Hindistonda Samsung Galaxy A07 5G smartfonini rasman sotuvga chiqardi. Qurilma bundan avval Tailand va Filippinda taqdim etilgandi.
Yangi taqdim etilgan model katta ekran va sig‘imli batareya bilan ajralib turadi. Bu xususiyatlar bugungi kunda xaridorlar orasida yuqori talabga ega.
Galaxy A07 5G ikki xil xotira variantida taklif etilmoqda. 4 GB tezkor va 128 GB ichki xotirali versiya $165, 6 GB tezkor va 128 GB xotirali talqin esa $199 etib baholangan. Smartfon qora, och yashil va och binafsha ranglarda sotilmoqda.
Qurilmani Samsung do‘konlari, kompaniyaning rasmiy sayti hamda Hindistondagi vakolatli onlayn va oflayn savdo tarmoqlaridan sotib olish mumkin.
Texnik jihatdan Galaxy A07 5G 6,7 dyuymli HD+ PLS LCD ekran, 120 Hz yangilanish chastotasi va 800 nitgacha yorqinlikka ega. Qurilma IP54 standarti asosida changdan himoyalangan va suv sachrashiga chidamli. Orqa panel mustahkamroq materialdan tayyorlangan.
Smartfon MediaTek Dimensity 6300 protsessori bilan jihozlangan. Operatsion tizim sifatida Android 16 va One UI 8.0 o‘rnatilgan bo‘lib, qurilma olti marta yirik Android yangilanishi va olti yilgacha xavfsizlik yangilanishlarini olishi rejalashtirilgan.
Kamera qismi 50 Mp asosiy sensor, 2 Mp chuqurlik datchigi va 8 Mp old kamera bilan ta’minlangan. Batareya sig‘imi 6 000 mA/soatni tashkil etadi va 25 Vt tezkor simli quvvatlashni qo‘llab-quvvatlaydi.
P4 Power smartfoni
Hindistonda Realme kompaniyasi yangi avtonomiyaga ega Realme P4 Power smartfonini savdosini boshladi.
Kompaniya ma’lumotlariga ko‘ra, birinchi soat ichidagi savdo hajmi avvalgi modelga nisbatan 291% ga oshgan, biroq qaysi model bilan solishtirilgani aniq emas. Sotilgan qurilmalar soni ham ochiqlanmadi.
Realme P4 Power kompaniyaning 10 000 mA/soat quvvatga ega birinchi smartfoni sifatida taqdim etildi.
Qurilma 6,8 dyuymli AMOLED ekran, 1,5K o‘lcham, 144 Hz kadr tezligi, 50 megapikselli asosiy kamera va IP69 himoya standartiga ega. Smartfon MediaTek Dimensity 7400 Ultra chipi bilan jihozlangan bo‘lib, asosiy 8/128 GB versiyasining narxi $265 ni tashkil qiladi.
iQOO 15 Ultra
iQOO kompaniyasi o‘zining eng qudratli flagman smartfoni – iQOO 15 Ultra modelini rasman taqdim etdi.
Smartfon Snapdragon 8 Elite Gen 5 platformasida ishlaydi va Q3 nomli maxsus o‘yin chipi bilan jihozlangan. Qurilmani sovitish uchun ventilyatorli faol sovitish tizimi qo‘llanilgan. Eng yuqori konfiguratsiyada 24 GB tezkor xotira va 1 TB ichki xotira mavjud.
iQOO 15 Ultra 6,85 dyuymli tekis Samsung M14 ekraniga ega bo‘lib, 2K aniqlik va 144 Gts yangilanish tezligini taqdim etadi. Ekranning maksimal yorqinligi 8000 nitni tashkil etadi.
Smartfon 7400 mA/soat sig‘imli akkumulyator bilan jihozlangan. Qurilma 100 vattli simli va 40 vattli simsiz quvvatlashni qo‘llab-quvvatlaydi. To‘plamga o‘yinda telefonni gorizontal ushlashga xalaqit bermaydigan L-shaklli kabel kiritilgan.
Qurilmada uchta 50 megapikselli sensorli kamera o‘rnatilgan. Ulardan biri 3 karra optik zum bilan suratga olish imkonini beradi.
iQOO 15 Ultra IP69 darajasidagi chang va suvdan himoyaga ega hamda ultratovushli barmoq izi skaneri bilan jihozlangan.
Narxlari quyidagicha:
16/256 GB — $790,
16/512 GB — $865,
16 GB/1 TB — $1000,
24 GB/1 TB — $1110.
Xiaomi 17 seriyasi uchun yangi dasturiy ta’minot
Xiaomi kompaniyasi Xiaomi 17, Xiaomi 17 Pro va Xiaomi 17 Pro Max smartfonlari uchun yangi 3.0.44.0.WPCCNXM dasturiy ta’minot yangilanishini taqdim etdi.
Yangilanish hozirda barqaror beta-test bosqichida bo‘lib, foto va video sifatini yaxshilashga qaratilgan. Ayniqsa, olov-shou va sahna chiqishlari kabi murakkab sharoitlarda ham smartfonlar samarali ishlaydi. Xiaomi 17 Ultra modelida ishlatiladigan aqlli sahna aniqlash tizimi asosiy kamerada ham qo‘llab-quvvatlanadi.
Xiaomi 17 Pro va Xiaomi 17 Pro Max modellari uchun videoda LOFIC rejimini qo‘lda yoqish imkoniyati qo‘shilgan. Bu rejim 4K formatida 60 kadr/sekund tezlikda video yozishni ta’minlaydi va yorug‘lik hamda soyalarni aniqroq uzatadi. Shuningdek, orqa kamera endi to‘liq kadrli video yozish funksiyasiga ega bo‘ldi.
Yangilanishda dinamik fotosuratlar funksiyasi ham joriy etilgan bo‘lib, videoga tushirish jarayonida yorqin lahzalarni saqlash imkonini beradi. Professional LOG formatida LUT-jadval qo‘llab-quvvatlash kengaytirildi va oldindan ko‘rish imkoniyati yaxshilandi. Kameraning interfeysi esa sozlanadigan asboblar paneli orqali yanada qulaylashtirildi.
Bundan tashqari, yangi funksiyalar qatoriga old va orqa kameradan bir vaqtda yozuvni qo‘llab-quvvatlovchi ikki kamerali rejim, sekinlashtirilgan va tungi suratga olishni yaxshilash hamda ultra keng burchakli obyektivdan foydalanganda tasvir buzilishini tuzatish kiradi.
IKEA’ning yangi dizayndagi bluetooth-kolonkasi
IKEA noodatiy dizayndagi yangi bluetooth-kolonkani taqdim etdi. Mebel ishlab chiqaruvchi kompaniya Grejsimojs kolleksiyasi doirasida sichqoncha shaklidagi ko‘chma binafsha rang kolonkani sotuvga chiqardi.
Unga ko‘ra, mazkur qurilma «yoqimli ko‘rinishi bilan kayfiyatni ko‘taradi, raqsga chorlaydi va uyga iliqlik bag‘ishlaydi». U oshxonadagi jo‘shqin ritmlardan tortib, uxlash oldi ertaklarigacha bo‘lgan turli holatlar uchun mos keladi. Kolonkaning narxi taxminan $13 ni tashkil etadi.
Sichqoncha shaklidagi kolonkaga qulay ko‘tarib yurish uchun arqonli remeshok o‘rnatilgan. Zaryadlash porti esa o‘yinchoqning qorin qismida yashirilgan. Qurilma Multi-Speaker funksiyasini ham qo‘llab-quvvatlaydi — bu orqali bir nechta IKEA bluetooth-kolonkalari birlashtirilib, musiqa sinxron tarzda ijro etilishi mumkin.
Oppo’ning A6v va A6i+ modellari
Oppo kompaniyasi Xitoyda ikkita arzon narxli smartfon — A6v va A6i+ modellarini taqdim etdi.
Ularning boshlang‘ich narxlari mos ravishda $170 va $215 ni tashkil qiladi.
A6v modeli 6500 mAs batareyaga ega bo‘lib, 45 vattli tezkor quvvatlashni qo‘llab-quvvatlaydi. Smartfon bitta konfiguratsiyada — 8/256 GB xotira bilan taqdim etiladi. Qurilma Dimensity 6300 chipi, 50 MP asosiy kamera, Wi-Fi 5 va 6,8 dyuym HD+ ekran (120 Hz) bilan jihozlangan.
A6i+ modeli esa 7000 mAs batareya va xuddi shunday 45 Vt quvvatlash bilan ajralib turadi. Bundan tashqari, u IP69 standartiga muvofiq suvdan himoyaga ega. Platforma, xotira variantlari (8/256 GB dan 12/512 GB gacha), kamera va ekran xususiyatlari A6v bilan bir xil.
Ikkala model ham AMOLED ekran bilan ta’minlanmagan, lekin katta batareya va tezkor quvvatlash imkoniyati bilan kundalik foydalanish uchun qulay.
Samsung Galaxy F70e 5G smartfoni
Samsung kompaniyasi arzon narxdagi yangi smartfoni Galaxy F70e 5Gni rasmiy ravishda e’lon qildi.
Galaxy F70e 5G 6,7 dyuymli IPS ekran bilan jihozlangan bo‘lib, 120 Gts yangilanish chastotasiga ega. Qurilmaning yuragi sifatida MediaTek Dimensity 6300 protsessori ishlaydi. Bazaviy versiyada 4 GB operativ va 128 GB doimiy xotira mavjud. Suratga olish uchun 50 megapikselli kamera javob beradi, shuningdek, smartfon 6000 mA/soat quvvatga ega batareya bilan ta’minlangan bo‘lib, 25 vattli tezkor quvvatlashni qo‘llab-quvvatlaydi.
Qurilma Android 16 operatsion tizimi va One UI 8.0 interfeysi bilan ishlaydi, kelajakda esa olti yirik tizim yangilanishini olishi kutilmoqda. Qurilmaning qalinligi 8,2 mm bo‘lib, orqa qopqog‘i charm ko‘rinishini taqlid qiladi. Galaxy F70e 5Gning kutilayotgan narxi $110–$165 oralig‘ida bo‘ladi.
Ushbu smartfon boshlang‘ich darajadagi qurilmalar bozorida raqobatni kuchaytirishi kutilmoqda va foydalanuvchilarga katta ekran, kuchli batareya va zamonaviy apparat platformasini taklif etadi.
Avvalroq «Kursiv» Honor 600 modeli katta sig‘imli akkumulyator bilan taqdim etilishi mumkinligi haqida yozgandi.
