Toshkent viloyatining Angren shahrida joylashgan ko‘p qavatli uylardan birida yong‘in sodir bo‘ldi. Bu haqda Favqulodda vaziyatlar vazirligi ma’lum qildi.
Xabarga ko‘ra, joriy yilning 7-fevral kuni soat 23:19 da Angren shahar, Dukent qo‘rg‘oni Ulug‘bek MFY hududida joylashgan 4 qavatli binolardan birining tom qismi yonayotgani haqida Toshkent viloyati Favqulodda vaziyatlar bosh boshqarmasiga xabar kelib tushgan.
Shundan so‘ng qutqaruv va yong‘in o‘chirish ekipajlari soat 23:30 da voqea joyiga yetib borgan. Binoda bo‘lgan barcha fuqarolar tezkor ravishda evakuatsiya qilingan.
Yong‘in soat 23:57 da qurshab olinib, uni o‘chirish ishlari boshlangan. Bartaraf etish jarayoniga yetarli kuch va vositalar jalb qilingan bo‘lib, vaziyat vazirlik tomonidan to‘liq nazoratga olingan.
Ma’lum qilinishicha, yong‘in bugun, 8-fevral kuni soat 00:50 da to‘liq bartaraf etilgan. Yong‘in oqibatida bir kishi halok bo‘lgan.
Avvalroq «Kursiv» nashri Aviator’dagi yong‘inidan so‘ng O‘zbekistonda xavfsizlik tekshiruvlari boshlangani haqida yozgandi.
