Arizonada bo‘lib o‘tadigan Mecum auksionida Chevrolet Corvette Sting Ray 1963-yilgi Split Window modeli sotuvga chiqariladi. Bu haqda Tarantas news nashri xabar berdi.
Ushbu avtomobil qora Tuxedo Black rangda, vinil salon bilan jihozlangan va zavoddan chiqish holatida saqlangan. Bu Corvette’ning aynan Split Window dizayni uni dunyodagi eng qimmat va istalgan kolleksiya nusxalaridan biriga aylantiradi, chunki ushbu dizayn faqat 1963-yilda ishlab chiqarilgan.
1963-yil Chevrolet Corvette’ining ikkinchi avlodi, ya’ni Mid-Year yoki Sting Ray nomi bilan mashhur bo‘lgan model tarixiy burilish nuqtasi bo‘lgan. Avtomobil 1959-yilgi Stingray kontsept-dizaynidan ilhomlangan va o‘zining noyob kupе shakli, Split Window orqa oynasi bilan mashhur. Bu detal faqat bir yil ishlab chiqarilgan va shuning uchun dunyo bo‘ylab kolleksionerlarga juda qimmat baholangan.
Auksionga chiqarilgan nusxa zavod rangida Tuxedo Black bilan bo‘yalgan bo‘lib, qora vinil salon avtomobilning jiddiy va klassik ko‘rinishini yanada ta’kidlaydi. Split Window modeli o‘zining markaziy elementlari bilan tanilgan bo‘lib, bu dizayn orqa oynadan o‘tayotgan chiziq orqali butunlay ajralib turadi. Avtomobil yashirin faralar, dekorativ ventilyatsiya elementlari va klassik coupe shakli bilan ham ajralib turadi.
Texnik tomondan Corvette 1963 modelining innovatsiyalari ham katta ahamiyatga ega. Ushbu model barcha to‘rtta g‘ildirakda mustaqil suspenziyaga ega bo‘lib, yangi ramkali konstruksiya orqali boshqaruv va qulaylik sezilarli darajada yaxshilangan. Auksionga chiqadigan avtomobil 5,4 litr V8 Small Block dvigateli bilan jihozlangan bo‘lib, 327 kub dyuym hajmiga ega va 4 pog‘onali Muncie mexanik transmissiya bilan birga ishlaydi.
Avvalroq Kursiv Uzbekistan Chevrolet Tahoe narxidagi minilmagan «Jiguli» sotuvga qo‘yilgani haqida yozgandi.
