AvtoVAZ’ning sobiq muhandisi KhaDm kanalida Lada Iskra atrofida muhokama qilinayotgan muammoni izohladi. Gap kuzov panellari orasidagi katta va notekis bo‘shliqlar haqida ketmoqda.
Uning aytishicha, hozir ishlab chiqarilayotgan barcha Lada Iskra avtomobillari aslida prototip hisoblanadi. Shu sababli yig‘ilish sifati mashinadan mashinaga keskin farq qilmoqda.
Hozir kapot va bagaj qopqog‘ining qiyshiq joylashuvi asosiy muammolardan biri bo‘lib qolmoqda. Aksariyat avtomobillarda bo‘shliqlar deyarli sezilmaydi. Biroq ayrim mashinalarda ularni tekislashning imkoni yo‘q.
U hatto dilerlik salonida suratga olingan avtomobilni ham ko‘rsatgan. Unda kapot bilan bamper orasidagi bo‘shliqqa barmoq bemalol sig‘adi. Qarama-qarshi tomonda esa deyarli bo‘shliq bo‘lmagan.
Shu bilan birga, Lada Iskra oyiga bir necha ming dona miqdorida ishlab chiqarilmoqda. Bu model sanoat hajmida yig‘ilayotganini ko‘rsatadi. Biroq sifat masalalari hali to‘liq hal qilinmagan.
KhaDm ma’lumotiga ko‘ra, to‘liq tayyor va sifatli seriyali Lada Iskra avtomobillari faqat mart-aprel oylarida konveyerdan chiqishni boshlaydi.
Eslatib o‘tamiz, Kursiv Uzbekistan nashri Lada avtomobillari Apple’ning CarPlay sahifasida paydo bo‘lgani haqida yozgan edi.
