Haval brendi Qozog‘iston bozorida model qatorini yangilash doirasida Dargo va Dargo X krossoverlari savdosini to‘xtatmoqda. Bu haqda Autochina nashri ma’lum qildi.
Ma’lum bo‘lishicha, standart Haval Dargo modeli brendning Qozog‘istondagi rasmiy saytida endi mavjud emas. Uning krossover talqini bo‘lgan Dargo X esa hozircha rasmiy ro‘yxatdan o‘chirilmagan. Astana Motors kompaniyasi Haval Dargo mahsulot portfelidan chiqarilganini, Dargo X savdosi esa dilerlarda qolgan 2025 model yiliga mansub avtomobillar sotilib bo‘lingach yakunlanishini tasdiqladi.
Kompaniya hozircha ushbu modellar o‘rniga qaysi avtomobil taklif etilishini oshkor etmadi. Distribyutor Great Wall Motor bilan hamkorlikda xaridorlar kutganiga yaxshiroq mos keladigan yangi variantlarni o‘rganayotganini ma’lum qildi, biroq aniq muddatlar belgilanmagan.
Shu bilan birga, 2025-yil noyabr oyida Qozog‘istonda ilgari Raptor nomi bilan tanilgan Haval V7 krossoveri taqdim etilgan bo‘lib, u dizayni va bozordagi joylashuvi jihatidan Dargo ketganidan so‘ng bo‘shagan segmentni egallashi mumkin.
Eslatib o‘tamiz, avvalroq Haval kompaniyasi H9 ramali yo‘ltanlamasining yangilangan 2026-yilgi versiyasini taqdim etgan edi.
