O‘zbekistonda pora olish ko‘rsatkichi yomonlashdi
Transparency International tashkilotining 2025-yil uchun yillik ma’lumotlariga ko‘ra, O‘zbekiston yangilangan Korrupsiyani qabul qilish indeksida (CPI) 100 balldan 31 ball oldi va 182 mamlakat orasida 124-o‘rinni egalladi.
2024-yilga nisbatan mamlakat balli 1 ballga kamaydi. 2012-yildan beri uzoq muddatli o‘sishga qaramay, so‘nggi ikki yil ichida dinamika sekinlashdi: 2023-yilda eng yuqori cho‘qqiga chiqqanidan so‘ng, indeks pasayishni boshladi.
Qo‘shni Qozog‘iston esa O‘zbekistonga qaraganda yaxshi ko‘rsatkichni qayd etgan. Qozog‘istonda reyting 2 ballga kamaysa ham mamlakat 38 ball bilan Markaziy Osiyoda korrupsiya holati kam davlat bo‘la oldi.
Qirg‘izistonning ko‘rsatkichi (26 ball, +1) yaxshilangan bo‘lsa, Turkmaniston (17) va Tojikiston (19) ko‘rsatkichlari o‘zgarishsiz qoldi.
Transparency International tashkilotining ta’kidlashicha, sud hokimiyatining zaif mustaqilligi, hukumatning cheklangan javobgarligi va avtokratiyaning yuqori darajasi Sharqiy Yevropa va Markaziy Osiyo mamlakatlari uchun asosiy muammolar bo‘lib qolmoqda, bu esa tizimli korrupsiyaning saqlanib qolishiga hissa qo‘shadi.
Korrupsiyani qabul qilish indeksi davlat sektoridagi korrupsiya darajasini mutaxassislar va tadbirkorlarning so‘rovnomalari asosida baholaydi. Maksimal 100 ball minimal korrupsiyani ko‘rsatadi.
Reytingda Daniya 89 ball bilan (o‘tgan yilga nisbatan bir ball past) birinchi o‘rinda. Finlyandiya 88 ball bilan ikkinchi o‘rinda, Singapur esa 84 ball bilan uchinchi o‘rinda, bu ham o‘tgan yilgi natijaga teng.
Transparency International tashkiloti 2025-yil natijalarini tavsiflab, global korrupsiyaga qarshi kurash ko‘rsatkichi pasayib borayotganini ta’kidlaydi (o‘rtacha ball 42 ballgacha yangi eng past ko‘rsatkichga tushdi). Bundan tashqari, ko‘plab mamlakatlarda vaziyat yomonlashmoqda yoki turg‘unlashmoqda. Hatto an’anaviy ravishda eng yaxshi o‘ntalikning ko‘p qismini egallagan Yevropa mamlakatlarida ham korrupsiyani qabul qilishning o‘rtacha ko‘rsatkichi pasaygan.
Avvalroq «Kursiv» Surxondaryoda tuman ekologiya bo‘limi boshlig‘i pora bilan ushlangani haqida yozgandi.
