12-fevral kuni Malayziyaning Kuala-Lumpur shahrida futbol bo‘yicha 2026-yilgi U-17 Osiyo kubogiga qur’a tashlash marosimi bo‘lib o‘tadi. Bu haqda O‘FA xabar bermoqda.
Qur’a jarayonida ishtirokchi jamoalar 4 ta savatchaga ajratilgan. O‘zbekiston U-17 terma jamoasi musobaqa mezboni Saudiya Arabistoni, shuningdek, Yaponiya va Koreya Respublikasi bilan birgalikda 1-savatchadan joy olgan. Qolgan uchta savatchada Osiyoning yana 12 ta terma jamoasi, jumladan, Tojikiston, Avstraliya va Hindiston kabi davlatlar vakillari taqsimlangan.
Mazkur qit’a birinchiligi Qatarda o‘tkaziladigan 17 yoshgacha bo‘lgan futbolchilar o‘rtasidagi FIFA Jahon chempionatiga saralash vazifasini ham o‘tab beradi. Musobaqa yakunlariga ko‘ra, qit’aning eng yaxshi 8 ta jamoasi 2026-yilgi o‘smirlar o‘rtasidagi mundialda ishtirok etish huquqini qo‘lga kiritadi.
Avvalroq Kursiv Uzbekistan U-17 Osiyo kubogiga qur’a tashlash marosimi sanasi va joyi ma’lum bo‘lgani haqida xabar bergan edi.
