AQShning Montana shtatida 1957-yilgi to‘rtta eski Chevrolet klassik sedan bir vaqtning o‘zida auksionga chiqarildi. Bu haqda GM Authority xabar bermoqda. Lot uchta Chevrolet Bel Air va bitta Chevrolet 150 modelidan iborat.
Mashinalar hozirgi egasining otasi tomonidan 1970-yillarda yig‘ila boshlangan. Ular vaqt o‘tishi bilan ehtiyot qismlar bilan to‘ldirilgan holda saqlangan. Hozir barcha avtomobillar egasi nomidagi toza Montana hujjatlariga ega.
Oq rangli Bel Air V8 dvigatel va avtomat uzatma bilan jihozlangan. Odometrda 91 ming mil ko‘rsatilgan. Kuzov bezaklari saqlangan bo‘lsa-da, bo‘yoq qatlami eskirgan. Old o‘ng qanot bezagi mos emas. Orqa yon oynalar yorilgan.
Ko‘k rangli Bel Air’lardan biri ham V8 va mexanik uzatma bilan jihozlangan. Unda 72 ming mil ko‘rsatkich bor. Old qanotlarda qizil grunt ko‘rinib turadi. Ba’zi bezak elementlari yetishmaydi. Yon oynalarda yoriqlar mavjud.
Qizil-oq rangdagi Chevrolet 150 esa qatorli olti silindrli dvigatel va rul ustunidagi mexanik uzatma bilan taklif qilinmoqda. Odometr 97 ming milni ko‘rsatadi. Kuzovda zang izlari bor. Eshik osti va pol qismida korroziya kuzatiladi. Ayrim xrom va zanglamas bezaklar yo‘qolgan.
To‘rtinchi avtomobil yana bir ko‘k Bel Air kuzovi hisoblanadi. U aslida V8 bilan ishlab chiqarilgan, biroq hozir dvigatel va transmissiyasiz holatda. Mashina harakatlana olmaydi. Bamperlar hamda pribor panelining ayrim qismlari mavjud emas.
Lot tarkibiga qo‘shimcha ehtiyot qismlar ham kiradi. Kuzov, shassi, dvigatel va salon detallari alohida saqlangan. Hozircha savdolar $500dan boshlangan. Auksion 18-fevralda yakunlanadi.
To‘rtta klassik avtomobilni birgalikda xarid qilish restavratsiya ixlosmandlari uchun qiziqarli imkoniyat bo‘lishi mumkin. Biroq ularning holati qo‘shimcha vaqt va mablag‘ talab etishi ehtimolini ham ko‘rsatadi.
Eslatib o‘tamiz, Kursiv Uzbekistan 1965-yilgi Chevrolet avtomobili $88 mingga sotilgani haqida yozgan edi.
