Chevrolet Malibu’ga raqobatchi sifatida qaraladigan Kia K5 modeli yana savollar markaziga chiqdi. Threads ijtimoiy tarmog‘ida @zhak1yanova nomli foydalanuvchi kuzatuvchilariga avtomobilning qulayliklari haqida savol berdi.
Maqola quyidagilardan iborat:
Asosiy e’tirozlar
Tanqid qiluvchilar, avvalo, shovqin izolyatsiyasini tilga oladi. Ba’zilar avtomobilning tortishi va tormoz tizimini ham keskin baholaydi. Past klirens va qattiq osma haqida ham ko‘plab mulohazalar bildirildi.
Ayrim haydovchilar rul qoplamasi tez yeyilishini yozgan. Ularning fikricha, bu muammo nafaqat K5, balki boshqa Kia va Hyundai modellari uchun ham xos.
2,0 litrli turboversiyalar egalari motorni «injiq» deb ataydi. Ular moyni tez-tez almashtirishni tavsiya qiladi. Ba’zi izohlarda silindrlarda tirnalish, katalizator va moy yeyish holatlari eslatilgan. Boshqa foydalanuvchilar esa 2020-yildan keyingi avtomobillarda bunday muammolar deyarli kuzatilmasligini aytadi.
Alohida mavzu bu Xitoyda yig‘ilishi. Ko‘pchilik «sof koreys» variantini izlashni maslahat beradi. Ular metall va pardoz sifatida farq borligini ta’kidlaydi.
Ijobiy fikrlar
Shu bilan birga, ijobiy fikrlar ham ko‘p. Ayrim haydovchilar K5’ni olib pushaymon bo‘lmaganini yozadi. 2021-yilgi avtomobilni 250 ming km masofada taksi rejimida boshqargan foydalanuvchi uni mustahkam deb baholagan.
Ko‘plab egalar 85 – 110 ming km yurgan avtomobillarda jiddiy nosozlik bo‘lmaganini bildiradi. Ularning fikricha, muntazam texnik xizmat asosiy omil hisoblanadi. 1,6 turbo va 2,5 litrli dvigatellar ham tez-tez maqtaladi.
Taksida keng qo‘llanilishi ham model resursi mavjudligini ko‘rsatadi. Ayrim haydovchilar 400 – 500 ming km masofani bosib o‘tgan avtomobillar borligini aytadi.
Raqiblar fonida tanlov
Bahslar Hyundai Sonata va Toyota Camry bilan taqqoslamalarsiz o‘tmadi. Ba’zilar Camry yumshoqroq va likvidroq deydi. Boshqalar esa K5’ni dinamikroq va dizayni jihatidan jozibaliroq deb hisoblaydi.
Ayrim foydalanuvchilar esa past osma tizimi sababli krossoverlarga e’tibor qaratishni tavsiya qiladi.
Eslatib o‘tamiz, Kursiv Uzbekistan nashri Rossiyada Kia Sportage 2026 avtomobili qanday narxda sotilishi haqida yozgan edi.
