Honor kompaniyasi arzon narxdagi yangi planshet va smartfonni, Infinix esa iPhone 17 Pro Max’ni eslatuvchi smartfonni taqdim etdi. Hafta davomidagi gadjetlar bilan Kursiv Uzbekistan’ning texnodayjestida tanishing.
Ushbu maqolada quyidagilar bilan tanishasiz:
- Honor’ning Pad X8 plansheti
- Casio soatlari
- Sony quloqchinlari
- Honor X6d smartfoni
- iPhone 17 Pro Max’ni eslatuvchi Infinix 60 Pro smartfoni
- Aqlli changyutgichlari bilan mashhur Dreame’ning ilk smartfonlari
Honor’ning Pad X8 plansheti
Honor kompaniyasi arzon narxdagi yangi Pad X8 planshetini taqdim etdi.
Planshet 11 dyuymli ekranga ega. Panel 1920×1200 piksel o‘lchamga ega va 90 Hz yangilanish tezligini qo‘llab-quvvatlaydi. Bu esa rasm va video ko‘rish tajribasini silliq qiladi.
Qurilmaning ichki ishlashi Snapdragon 680 protsessori asosida tashkil etilgan, lekin u 5G’ni qo‘llab-quvvatlamaydi. Pad X8 modeli 4 GB operativ va 128 GB doimiy xotira bilan jihozlangan.
Boshqa texnik xususiyatlar qatorida 5 megapikselli kamera, 7,5 mm qalinlikdagi metall korpus, to‘rt nafar dinamik, bolalar rejimi, 496 gramm og‘irlik va Android 16 tizimi ustida ishlaydigan MagicOS 10 interfeysi mavjud.
Qurilma $175 narxda sotuvga chiqarilgan bo‘lib, 10 100 mA/s soat quvvatga ega katta batareya bilan jihozlangan.
Casio soatlari
Casio kompaniyasi AQSh bozorida G-Shock GMWBZ5000D-1, GMWBZ5000BD-1 va GMWBZ5000GD-9 soatlarini taqdim etdi.
Soatlar 49,3 x 43,6 x 13 mm o‘lchamdagi zanglamaydigan po‘lat korpus va uch martali qulflanish tizimiga ega metall bilaguzuk bilan jihozlangan. GMWBZ5000D-1 kumush rangga, GMWBZ5000BD-1 qora, GMWBZ5000GD-9 esa oltin rangga ega. Yangi zarbaga chidamli konstruksiya polimer himoya qatlam bilan qoplangan bo‘lib, korpus mustahkamligini saqlaydi.
Soat yuqori kontrastli MIP LCD-ekranga ega bo‘lib, o‘qish qulayligini va energiya samaradorligini oshiradi. U sakkiz turdagi ko‘rsatish rejimini taqdim etadi, jumladan vaqt, sana va kunni, shuningdek uchta vaqt zonasini ikki turdagi shrift bilan ko‘rsatadi. LCD-ekran keng ko‘rish burchaklarini ta’minlaydi va quyosh nuri ostida ham aniq ko‘rinadi.
Ulangan imkoniyatlar qatorida Casio Watches ilovasi orqali Bluetooth, Multi Band 6 radiosignali kalibrlash va Tough Solar tizimi mavjud bo‘lib, soat atrof-muhit yorug‘ligidan quvvat oladi. To‘liq zaryadlangan batareya energiya tejash rejimida 22 oygacha ishlay oladi.
Shuningdek, 38 dunyo vaqt zonasi, sekundomer, orqaga hisoblagich, beshta signal, LED yoritish, 2099-yilgacha avtomatik taqvim kabi funksiyalar ham mavjud. Soatlar 200 metr chuqurlikdagi suvga chidamli qilib ishlangan. Orqa qopqog‘i burama.
GMWBZ5000D-1 modeli $660 ga, qora va oltin modellar $720 ga sotiladi.
Sony quloqchinlari
Sony kompaniyasi yangi flagman to‘liq simsiz quloqchinlari WF-1000XM6 ni taqdim etdi. Yangi model avvalgi avloddan tashqi ko‘rinishi bilan farq qiladi.
Quloqchinning ichki tarkibi ham yangilangan. Ichida V2 audio protsessori mavjud bo‘lib, u 32-bitli ovoz ishlov berishni qo‘llab-quvvatlaydi. Sony ma’lumotiga ko‘ra, bu yangi protsessor aniqroq ovoz, kengroq dinamik diapazon va yuqori detalizatsiya bilan audio sifatini yaxshilaydi.
Qurilma 8,4 mm diametrli drayverlarga ega. Audio kodeklar sifatida AAC, SBC, LC3 va LDAC qo‘llaniladi, shuningdek, siqilgan audio fayllar sifatini oshirish uchun Sony DSEE Extreme sun’iy intellekt algoritmi ishlatiladi. Ulanish imkoniyatlari sifatida Bluetooth 5.3 (LE), Auracast, Fast Pair va Swift Pair mavjud.
Shovqinni kamaytirish funksiyasi QN3e protsessori va sakkizta mikrofon orqali amalga oshiriladi. Batareya ishlash muddati 8 soat, qo‘shimcha 16 soat esa qopqoq orqali ta’minlanadi. Qurilma IPx4 darajasida namlikdan himoyalangan, bu esa kundalik foydalanishda qulaylik yaratadi. Quloqchinning narxi bilan bu yerda tanishing.
Honor X6d smartfoni
Honor kompaniyasi arzon narxdagi X6d smartfonini bozorga chiqardi. U ilgari chiqqan Play 60A modeliga juda o‘xshash, ammo ayrim farqlar mavjud.
Yangi telefon BAA bozorida $140 narxda paydo bo‘ldi. Bu pulga foydalanuvchi boshlang‘ich darajadagi imkoniyatlarga ega qurilmaga ega bo‘ladi. Narxiga yarasha, model akkumulyatori unchalik katta emas.
Telefon 5260 mA/soat batareyaga ega. Uning ishlashini Dimensity 6300 protsessori ta’minlaydi, xotirasi esa 4/256 GB. Shuningdek, 50 megapikselli kamera, 6,75 dyuymli 720p ekran, Wi-Fi 5 va Android 15 tizimi mavjud. Biroq qurilmada NFC funksiyasi mavjud emas.
iPhone 17 Pro Max’ni eslatuvchi Infinix 60 Pro smartfoni
Infinix kompaniyasi 60 Pro nomli yangi smartfonini namoyish qildi.
Dizayni jihatidan u iPhone 17 Pro Max’ni eslatadi, biroq Xitoy brendi qurilmasi kattaroq batareya va kamera blokiga joylashtirilgan mini-ekran bilan ajralib turadi.
Smartfon orqa panelidagi kamera modulida piksel tipidagi qo‘shimcha ekran joylashgan. U to‘liq displey bo‘lmasa-da, vaqt, havo harorati, bildirishnomalar, zaryadlanish jarayoni kabi ma’lumotlarni ko‘rsatish imkonini beradi. Bu yechim dizayn va funksionallikni uyg‘unlashtirgan noodatiy element sifatida baholanmoqda.
Texnik jihatdan Infinix 60 Pro Snapdragon 7s Gen 4 platformasiga asoslangan bo‘lib, o‘rta yuqori darajadagi unumdorlikni ta’minlaydi. Qurilma 6,8 dyuymli 1.5K aniqlikdagi, 144 Gts yangilanish chastotasiga ega ekran, 6500 mA·soat sig‘imli batareya va 90 vattli tezkor quvvatlash texnologiyasi bilan jihozlangan.
Shuningdek, smartfon 50 megapikselli asosiy kameraga ega. Infinix 60 Pro’ning to‘liq taqdimoti MWC 2026 ko‘rgazmasida bo‘lib o‘tishi kutilmoqda.
Aqlli changyutgichlari bilan mashhur Dreame’ning ilk smartfonlari
Aqlli changyutgichlar va maishiy texnika ishlab chiqarish orqali dunyoga tanilgan Dreame kompaniyasi rasmiy ravishda smartfon bozoriga kirib keldi.
Brend Polshada o‘tkazilgan taqdimotda bir vaqtning o‘zida uchta modelni namoyish qildi – flagman RS1, yupqa va yengil Air1 hamda budjet toifasidagi E1.
Kompaniya ma’lumotiga ko‘ra, dastlab Polshada sotuvga chiqariladigan ushbu smartfonlar keyinchalik Yevropaning boshqa mamlakatlarida ham taklif etiladi. Hozircha qurilmalarning narxlari ochiqlanmadi.
Eng kuchli model – Dreame RS1 eng so‘nggi Snapdragon 8 Elite Gen 5 protsessoriga asoslangan. Smartfon 144 Gts yangilanish chastotasiga ega, hech qanday kesmasiz tekis ekran bilan jihozlangan. Qurilma 7200 mA·soat sig‘imli kremniy-uglerod akkumulyatoriga ega bo‘lib, 90 vattli simli va 80 vattli simsiz tezkor quvvatlashni qo‘llab-quvvatlaydi. Shuningdek, RS1 IP69 darajasida chang va suvdan himoyalangan. Kamera tizimi 50 MP + 50 MP + 64 MP sensorlardan iborat.
Qayd etilishicha, Dreame RS1 texnik jihatdan Nubia Z80 Ultra flagman modelining to‘liq nusxasi bo‘lib, faqat nomi o‘zgartirilgan.
Dreame Air1 esa ixcham va nihoyatda yupqa korpusi bilan ajralib turadi. Qurilma MediaTek protsessori asosida ishlaydi, qalinligi atigi 5,9 mm, og‘irligi esa 172 grammni tashkil etadi. Smartfon 5000 mA·soatli batareya va 108 megapikselli kamera bilan jihozlangan.
Budjet segmentidagi Dreame E1 modeli ham e’tiborga loyiq texnik ko‘rsatkichlarga ega. U 120 Gts yangilanish chastotasiga ega AMOLED displey va 108 megapikselli kamera bilan ta’minlangan.
Avvalroq «Kursiv» Samsung Galaxy F70e 5G smartfoni rasman taqdim etilgani haqida yozgandi.
