Chevrolet Braziliya bozorida yangi to‘liq Chevrolet Captiva elektromobilini taqdim etdi. Bu haqda CPG nashri ma’lum qildi. Modelning tavsiya etilgan narxi $40 ming etib belgilangan.
Avtomobil Xitoyda ishlab chiqariladi va mahalliy bozorda Xitoy brendlari bilan raqobatlashishga qaratilgan.
Captiva EV brendning elektrlashtirish strategiyasida Spark EUV va Equinox EV orasida joylashadi. Dastlab u Xitoydan import qilinadi, keyinchalik esa Seara shtatidagi Horizonte shahrida yig‘ilishi rejalashtirilgan.
O‘lcham va salon
Yangi model 4 745 mm uzunlik, 1 982 mm kenglik va 1 650 mm balandlikka ega. 2 800 mm g‘ildirak bazasi salon ichida kenglikni ta’minlaydi. Orqa qatorda tekis pol va ventilyatsiya chiqishlari bor.
Yukxona hajmi 403 litrni tashkil etadi. Unda zaryad kabelini saqlash uchun alohida bo‘lim mavjud. Bagaj qopqog‘i elektr boshqaruvga ega.
Salon to‘liq raqamlashtirilgan. Old panelda 15,6 dyuymli multimedia ekrani va 8,8 dyuymli raqamli asboblar paneli o‘rnatilgan. Tizim Apple CarPlay va Android Auto bilan mos ishlaydi. Modelda kalitsiz kirish, tugma orqali ishga tushirish va USB portlar bor.
Xavfsizlik tizimlari
Captiva EV adaptiv kruiz nazorati, yo‘lakni ushlab turish yordamchisi va avtomatik favqulodda tormoz tizimi bilan jihozlangan. Chevrolet buni Chevrolet Intelligent Driving paketi deb ataydi.
Test haydovlari davomida yo‘lakdan chiqish aniqlanganda tizim faol aralashuvi qayd etilgan. Adaptiv kruiz esa burilishlarda tezlikni yo‘l sharoitiga mos ravishda pasaytiradi.
Texnik ko‘rsatkichlar
Old o‘qda joylashgan elektromotor 201 ot kuchi va 31,6 kgfm moment ishlab chiqaradi. Tezlanish 0–100 km/soatga 9,9 soniyada amalga oshadi.
Batareya sig‘imi 60 kVt/soat. Inmetro standartiga ko‘ra yurish zaxirasi 304 kmni tashkil etadi. Real masofa yo‘l sharoiti va haydash uslubiga bog‘liq.
Tezkor zaryadlash 120 kVtgacha qo‘llab-quvvatlanadi. O‘zgaruvchan tok bilan quvvat 6,6 kVtni tashkil etadi. Batareya 8 yil yoki 160 ming km kafolatga ega.
Raqobat va pozitsiya
Captiva EV Xitoy brendlari hukmronlik qilayotgan segmentga kirib kelmoqda. Braziliyada BYD va boshqa ishlab chiqaruvchilar elektr SUV taklifini kengaytirgan.
Model ayrim qulayliklardan mahrum. Unda simsiz telefon zaryadlovchi, yo‘lovchi o‘rindig‘ining elektr sozlanishi va ikki zonali iqlim nazorati yo‘q.
Eslatib o‘tamiz, Kursiv Uzbekistan nashri Chevrolet Captiva elektromobili peshqadamga aylangani haqida yozgan edi.
