Apple kompaniyasi yaqin oylar ichida o‘zining yangi aqlli ko‘zoynaklarini ishlab chiqarishni boshlaydi. Bu haqda Bloomberg jurnalisti Mark Gurman ma’lum qildi.
Kompaniya qurilmani 2026-yil dekabr oyida ommaviy ishlab chiqarishga tushirishni rejalashtirmoqda. Rasmiy taqdimot va savdolar esa 2027-yilda boshlanishi kutilmoqda.
Ekransiz, lekin kuchli kamera bilan
Yangi ko‘zoynakda displey bo‘lmaydi. Biroq u yuqori aniqlikdagi kamera bilan jihozlanadi va foto hamda video tasvirga olish imkonini beradi. Interfeys dinamiklar, mikrofonlar va kameralar orqali ishlaydi.
Foydalanuvchilar quyidagi imkoniyatlarga ega bo‘ladi:
- telefon qo‘ng‘iroqlarini amalga oshirish;
- Siri orqali buyruqlar berish;
- atrof-muhitga qarab amallar bajarish;
- musiqa tinglash;
- suratga olish.
Ikki kamera va sun’iy intellekt
Ko‘zoynak ikkita kamera bilan ta’minlanadi:
- Yuqori aniqlikdagi tasvirlar uchun asosiy obyektiv.
- Kompyuter ko‘rish (computer vision) uchun maxsus sensor.
Ikkinchi kamera qurilmaga atrof-muhitni tahlil qilish, obyektlar orasidagi masofani aniqlash va kontekstni tushunishga yordam beradi.
Batareya elementlari to‘g‘ridan to‘g‘ri ko‘zoynak romiga joylashtiriladi. Dizaynda akril va boshqa yuqori sifatli materiallardan foydalaniladi.
Avvalroq Kursiv Uzbekistan Meta aqlli ko‘zoynaklariga insonlarni tanish funksiyasini qo‘shmoqchi ekanini yozgandi.
