2026-yilgi General Motors’ning yirik SUV modellari – Chevrolet Tahoe va Chevrolet Suburban uchun buyurtmalar tez orada yopiladi. Kompaniya dilerlarga yuborgan ichki xabarnomaga ko‘ra, 2026-model yiliga oid so‘nggi buyurtmalar 2026-yil 13-iyun haftasigacha tizimga kiritilishi kerak. Shundan so‘ng ishlab chiqarish jadvali yakuniy tasdiqlanadi.
Tahoe va Suburban bilan bir qatorda GMC Yukon modellari ham Texas shtatidagi Arlington zavodida ishlab chiqariladi. 2026-model yilining so‘nggi avtomobillari shu yilning 4-sentabrida konveyerdan tushirilishi rejalashtirilgan. Bu sana 2026-yilgi ishlab chiqarishning rasmiy yakuni hisoblanadi va zavod 2027-yilgi liniyaga tayyorgarlik ko‘radi.
Mutaxassislarning ta’kidlashicha, buyurtmalarni erta yopish yirik, rama konstruksiyali SUV’lar uchun odatiy amaliyotdir. 13-iyundan keyin dilerlar faqat mavjud avtomobillarni almashtirish yoki tayyor ishlab chiqarilgan variantlarni taklif qila oladi. Shu bois, rang, komplektatsiya va opsiyalarni aniq tanlamoqchi bo‘lgan mijozlar buyurtmani hozirdan rasmiylashtirishi tavsiya etiladi.
2027-yilgi modellarda esa keskin o‘zgarishlar kutilmayapti. Asosan, yangi ranglar, yangilangan disk dizaynlari va ayrim opsion paketlar bo‘yicha kichik yangilanishlar rejalashtirilgan. Hozircha kompaniya e’tibori 2026-yilgi buyurtmalarni yakunlashga qaratilgan.
Avvalroq Kursiv Uzbekistan yangi Chevrolet Tracker 2026 sotuvga chiqqani haqida yozgandi.
