Avtoekspert Felip Munoz O‘zbekiston avtomobil bozori haqida post qoldirdi, deb xabar berdi Kursiv Qozog‘iston. Unga ko‘ra, mamlakat bozori dunyodagi eng o‘ziga xos bozorlardan biri hisoblanadi.
2025-yilda O‘zbekistonda 433 ming dona avtomobil sotilgan. Bu ko‘rsatkich bo‘yicha mamlakat Belgiya va Niderlandiya bilan bir qatorda turadi. Biroq asosiy farq shundaki, savdoning 82 foizi davlat kompaniyasi UzAuto Motors tomonidan ishlab chiqariladigan Chevrolet brendiga to‘g‘ri keladi.
Ijtimoiy tarmoqlarda ayrim foydalanuvchilar bu vaziyatni hazil tariqasida «Chevroletston» deb atadi. Ko‘chalarda asosan oq rangli Chevrolet sedan va mikroavtobuslarini ko‘rish mumkin.
Eng ko‘p sotilgan model Chevrolet Cobalt bo‘ldi. 2025-yilda ushbu modeldan 128,5 ming dona sotilgan. Ikkinchi o‘rinda esa ko‘p yillardan beri deyarli o‘zgarmagan Chevrolet Damas turibdi.
Shunga qaramay, bozor asta-sekin o‘zgarishni boshlamoqda. Top-10 talikka Xitoy brendlari BYD va Chery ham kirib keldi. Chevrolet Onix kuchli beshlikka kirgan bo‘lsa-da, uning savdosi 2 foizga kamaygan.
2025-yil yakunlariga ko‘ra, Chevrolet 355 ming dona bilan mutlaq yetakchi bo‘ldi. BYD savdoni 39 foizga oshirdi. Kia esa brendlar orasida ikkinchi o‘rinni egalladi.
Tarmoq foydalanuvchilari avtomobil narxlari haqida tanqidiy fikrlar bildirmoqda. Shu bilan birga, O‘zbekiston bozori jahon avtosanoati uchun jozibador yo‘nalishga aylanayotgani qayd etildi.
Eslatib o‘tamiz, avvalroq yangi Chevrolet Damas Max va Move sotuvi boshlangani haqida xabar berilgandi. Mazkur avtomobillarni xarid qilish bo‘yicha shartnomani kompaniyaning barcha rasmiy dilerlik markazlarida rasmiylashtirish mumkin. Sotuvlar butun respublika bo‘ylab yo‘lga qo‘yilgan.
