You Tube’dagi Jahongir Uz kanali Sergeli avtobozoridan video tayyorladi. Unda Chevrolet Cobalt avtomobilining narxlarini ko‘rish mumkin. Modelning narxlari foydalanish holati, yurish masofasiga qarab farq qiladi.
Narxlar
Videoga ko‘ra, bozorda asosan 2022 – 2025-yillardagi Cobalt’lar taklif qilinmoqda. Ayrim yurmagan holatdagi mashinalar $12,3 ming atrofida baholanmoqda. Muallif Ramazon oyida chegirma berilayotganini aytib, ayrim avtomobillarni $12,2 minggacha tushirishini bildiradi. Ba’zi variantlar uchun narx $12 ming darajasida kelishilishi mumkinligi qayd etiladi.
8-fevral kuni 2026-yilgi Cobalt’ning MCM va Stay komplektatsiyalari $14 mingdan $14,2 minggacha narxlarda baholangan. 2025-yilgi Midnight variantlari esa $12,5 mingdan $12,8 minggacha bo‘lgan oraliqda taklif etilgan edi.
Savdolarda notarial rasmiylashtirish bepul ekani ta’kidlanadi. Ayrim mijozlar uchun kredit yoki muddatli to‘lov varianti ham mavjud. Bloger 12 ta viloyatda avtokredit rasmiylashtirish imkoniyati borligini ham eslatib o‘tgan.
Gazli variantlar va jihozlar
Taklif etilayotgan avtomobillar orasida metan va propan gazli variantlar mavjud. Ba’zilarida to‘rtta gaz balloni o‘rnatilgan. «Midnight» uslubidagi qora rangli hamda metallik bo‘yoqli modifikatsiyalar borligi ko‘rsatilgan. Salonida tugmali boshqaruv, monitor va zamonaviy opsiyalar mavjudligi ham namoyish etilgan.
Muallif ayrim avtomobillarning 15 ming km atrofida yurganini, ba’zilari esa deyarli yangi holatda ekanini aytadi. Xaridorga mashinani tekshiruvdan o‘tkazib, egasi bilan yuzma-yuz rasmiylashtirish imkoniyati borligi ta’kidlangan.
Raqobat va ogohlantirish
Bozor atrofida vositachilar ko‘p, xaridorlar ehtiyot bo‘lishi kerak. Bloger bankdan qaytgan yoki to‘lov muammosi bo‘lgan mashinalarni arzon narxda taklif qilinishi mumkinligini eslatgan. U o‘z savdo joyida avtomobillar tekshirilgan va ishonchli ekanini ta’kidlaydi.
Xaridorlar fikri
Videoda Farg‘ona, Sirdaryo, Qashqadaryo va Surxondaryodan kelgan mijozlar intervyu bergan. Ular narxlar ma’qul kelgani va savdo tez rasmiylashtirilganini aytgan Ayrimlar notarial xizmat bepul bo‘lganini tasdiqlaydi. Ba’zi xaridorlar mashinani naqd pulga olganini alohida ta’kidlaydi.
Eslatib o‘tamiz, Kursiv Uzbekistan nashri 8-fevral kungi Sergeli avtomobil bozoridagi narxlar haqida yozgan edi.
