Mazda 2026-yilgi yangi CX-5 bilan dizayn poygasiga qo‘shilishni emas, balki o‘z falsafasiga sodiq qolishni tanlagan. Model kattalashgan, jimroq va yanada nafis bo‘lgan, biroq asosiy savol ochiq qolmoqda: quvvat yetarlimi?
Yangi avlod CX-5 tashqi ko‘rinishda keskin o‘zgarish qilmagan. Dizayn evolyutsion tarzda yangilangan: faralar va orqa chiroqlar yanada o‘tkir va zamonaviy, kuzov esa biroz yiriklashgan. U ko‘proq shahar uchun mo‘ljallangan krossover sifatida ko‘rinadi. Eng yorqin rang — Soul Red — model xarakterini yanada ochib beradi.
Salon esa an’anaviy tarzda sinfidagilardan ustun. Materiallar sifati yuqori, boshqaruv elementlari mustahkam va intuitiv. Endi 12,9 dyuymli yoki 15,6 dyuymli sensorli ekran taklif etiladi, Google built-in integratsiyasi mavjud. Oldingi Command Control aylantirma boshqaruv tugmasi olib tashlangan.
Eng katta yangiliklardan biri — orqa o‘rindiqlar. Segmentdagi eng keng salonlardan biri aynan CX-5’da bo‘lishi mumkin. Oyoq va bosh uchun joy juda keng, yukxona ham bundan zarar ko‘rmagan. Orqa eshiklar 90 darajagacha ochiladi, yuklash balandligi pasaytirilgan.
Texnik tomondan model 2,5 litrli atmosfera to‘rt silindrli dvigatel bilan jihozlangan. U 187 ot kuchi va 186 lb-ft aylanish momentini taqdim etadi, uzatma — 6 pog‘onali avtomat, to‘liq g‘ildirakdan tortish (AWD) standart. Biroq aynan shu yerda CX-5’ning asosiy kamchiligi ko‘zga tashlanadi: tezlanish taxminan 8 soniya atrofida, bu esa segmentdagi ayrim raqiblarga nisbatan sustroq.
Yoqilg‘i sarfi ham rekord darajada emas — o‘rtacha 26 mpg atrofida. Masalan, Honda CR-V va Toyota RAV4 tejamkorlik va quvvat borasida ustunlikka ega.
Shunga qaramay, CX-5 boshqaruv hissi bilan ajralib turadi. Rul sezgir, osma tizimi muvozanatli, G-Vectoring Control Plus tizimi burilishlarda avtomobilni barqarorroq qiladi. U haydashni yoqtiradiganlar uchun yaratilgandek tuyuladi.
Avvalroq Kursiv Uzbekistan BYD Denza B8 elektromobili xavfsizlik sinovidan o‘tkazilgani haqida yozgandi.
