Oppo kompaniyasi Xitoy bozorida yangi o‘rta narxli simsiz quloqchinlari Enco Air5 Pro’ni rasman taqdim etdi. Bu haqda GSMArena texnonashri ma’lum qildi.
Texnik xususiyatlari
Naushniklar Bluetooth 6.0 ulanishini qo‘llab-quvvatlaydi va 12 mm dinamik drayverlarga ega. Oppo drayver amplitudasini 100% oshirganini bildiradi, bu esa yanada kuchli bassni ta’minlaydi. Shuningdek, qurilma LHDC 5.0 kodeki orqali Hi-Res audio oqimini qo‘llab-quvvatlaydi va shovqinni bekor qilish tizimi 55 dB darajasigacha yaxshilangan.
Batareya va qo‘shimcha imkoniyatlar
Naushniklar ANC o‘chirilgan AAC rejimida 13 soat davomida musiqa tinglash imkonini beradi, quvvatlovchi quti bilan umumiy foydalanish vaqti 54 soatga yetadi. Enco Air 5 Pro ikki aloqa imkoniyati, 3D surround ovoz va qurilma ichidagi SI tarjimani qo‘llab-quvvatlaydi. Qurilmalar IP55 standartiga mos ravishda suv va changga chidamli.
Narxi
Oppo Enco Air5 Pro qora va oq ranglarda taqdim etilgan bo‘lib, narxi $48 ni tashkil etadi. Xitoyda ochiq sotuvlar 2-martdan boshlanadi.
Eslatib o‘tamiz, avvalroq Sony yangi WF-1000XM6 quloqchinlarini taqdim etgan edi.
