Samarkand Marathon xalqaro bema! mukofotiga sazovor bo‘ldi
20-fevral kuni Samarkand Marathon xalqaro bema! (Best Experience Marketing Awards) mukofotining «Eng yaxshi sport loyihasi – International» nominatsiyasida g‘olib deb topildi. Bu haqda ma’lumotlar «Kursiv» nashriga ma’lum qilindi.
bema! mukofoti tadbir marketingi va integratsiyalashgan kommunikatsiyalar sohasida auditoriya uchun noyob tajriba va kuchli taassurot yarata olgan loyihalarni taqdirlaydi.
Samarkand Marathon haqida
Samarkand Marathon Series – O‘zbekistonda inklyuziyani targ‘ib qiluvchi va sport turizmini rivojlantiruvchi xalqaro xayriya yugurishlari turkumi. Loyiha 2019-yildan buyon o‘tkazib kelinadi va har yili minglab ishtirokchilarni birlashtiradi.
Dastur quyidagilarni o‘z ichiga oladi:
- 42,2 km marafon;
- yarim marafon;
- bolalar va nogironligi bo‘lgan shaxslar uchun masofalar;
- Skandinavcha yurish;
- atrof-muhitni tozalash bilan birga o‘tkaziladigan plogging yugurishlari.
Har bir yugurish madaniy dastur bilan boyitiladi hamda Samarqandning tarixiy markazida tashkil etiladi.
Xalqaro e’tirof
2017-yilda ta’sis etilgan bema! mukofoti tadbir marketingi va kommunikatsiyalar yo‘nalishidagi yetakchi xalqaro platformalardan biri hisoblanadi. Unda brendlar, agentliklar, korporativ jamoalar va davlat tashkilotlari ishtirok etadi. G‘oliblik loyiha professional darajasining yuqoriligini va xalqaro maydondagi e’tirofini anglatadi.
Samarkand Marathon Series tarkibiga, shuningdek, Bukhara Night Race, Sky Camp Bo‘stonliq va Zaamin Ultra kabi musobaqalar kiradi. Loyiha xayriya tashabbuslarini qo‘llab-quvvatlash, inklyuziv muhit yaratish va sport orqali ijtimoiy faollikni oshirishga qaratilgan.
Tashkilotchi haqida
Yugurishlar O‘zbekiston Madaniyat va san’atni rivojlantirish jamg‘armasi tomonidan tashkil etiladi. Jamg‘arma mamlakatning madaniy merosi va ijodiy iqtisodiyotini rivojlantirish, xalqaro hamkorlikni kengaytirish hamda yirik madaniy loyihalarni amalga oshirish bilan shug‘ullanadi.
bema! mukofotidagi g‘alaba Samarkand Marathon’ning nafaqat sport tadbiri, balki O‘zbekistonning xalqaro imijini mustahkamlovchi yirik madaniy va ijtimoiy loyiha ekanini yana bir bor tasdiqladi.
Avvalroq Kursiv Uzbekistan President Tech Awards mukofot jamg‘armasi $5 mlnga oshirilishi haqida yozgandi.
