Avtomobil bozoridagi so‘nggi tahlillar asosida 2026-yilning eng nufuzli va qulay o‘rta o‘lchamli avtomobillari aniqlandi. Mazkur reytingda Germaniyaning BMW va Porsche brendlari yetakchilik qilmoqda. Bu haqda CarBuzz nashri xabar bermoqda.
BMW X5 M modeli 617 ot kuchiga ega 4,4 litrli V8 gibrid dvigateli bilan ro‘yxatda peshqadamlik qilmoqda. Nashr ekspertlarining ta’kidlashicha, ushbu model sport dinamikasi va kundalik qulaylikni ideal tarzda birlashtirgan. Mazkur modelning boshlang‘ich narxi $131 mingni tashkil etadi.
«BMW M avtomobillari ko‘pincha qattiq haydash qulayligini taqdim qiladi, ammo X5 M Competition yetarli qulaylikni ta’minlaydi», – dedi CarBuzz tahririyati a’zosi Jared Rozenholts.
Kuchli uchlikdan Porsche Cayenne va butunlay elektr quvvati bilan harakatlanuvchi BMW iX modellari ham joy oldi. Cayenne o‘zining ko‘p sonli modifikatsiyalari va dinamik boshqaruvi bilan ajralib tursa, iX modeli zamonaviy interyeri va 650 ot kuchigacha bo‘lgan quvvati bilan e’tirof etilgan. Shuningdek, Lincoln Aviator modeli uch qatorli o‘rindiqlari va yuqori darajadagi qulayligi bilan to‘rtinchi pog‘onani band qildi.
Yaponiyaning Acura MDX va Lexus RX brendlari ishonchlilik hamda ergonomika jihatidan yuqori baholangan. Ro‘yxatdagi eng qimmat avtomobil Aston Martin DBX S bo‘lib, uning narxi $270,5 mingdan boshlanadi va 717 ot kuchiga ega. Reytingning keyingi o‘rinlarini Audi RS Q8, Genesis GV80 va Volvo XC90 modellari egalladi.
Avvalroq Kursiv Uzbekistan BMW X5 Year of the Horse cheklangan seriyasi taqdim etilgani haqida xabar bergan edi.
