Microsoft kompaniyasi butun dunyo bo‘ylab internet qamrovini oshirish maqsadida SpaceX’ning Starlink sun’iy yo‘ldosh xizmati bilan hamkorlikni e’lon qildi.
Microsoft barqarorlik masalalari bo‘yicha bosh direktori Melani Nakagavaning ma’lum qilishicha, loyihaning dastlabki bosqichida Keniyadagi internet provayderi bilan hamkorlikda 450 ta jamoat markazi tarmoqqa ulanadi. Bu qadam SpaceX uchun yangi talab darajalarini shakllantirishi kutilmoqda. Maskning koinot kompaniyasi joriy yilda IPO’ga aylanishi ehtimoli mavjud.
Mazkur hamkorlik Ilon Mask va Microsoft o‘rtasidagi murakkab munosabatlar fonida yuz bermoqda. Ayni vaqtda Mask Microsoft tomonidan qo‘llab-quvvatlanadigan OpenAI kompaniyasi va uning rahbari Sem Altmanga qarshi sud jarayonini olib bormoqda. Da’voda notijorat fonddan $134 mlrdgacha mablag‘ni undirish talab qilingan.
Shuningdek, Ilon Mask o‘zining X ijtimoiy tarmog‘ida Microsoft rahbariyatining o‘tmishdagi ayrim aloqalari yuzasidan tanqidiy fikrlar bildirgan edi. Shunga qaramay, texnologik hamkorlik davom etmoqda. O‘tgan yili Microsoft o‘zining bulutli dasturiy ta’minotiga Maskning xAI startapi tomonidan ishlab chiqilgan Grok modelini qo‘shganini e’lon qilgan edi.
Avvalroq Kursiv Uzbekistan Microsoft sun’iy intellektni rivojlantirishga 50 mlrd dollar ajratgani haqida xabar bergan edi.
