Xitoyda Honda Accord avtomobili uchun yirik chegirma e’lon qilindi. Bu haqda CarNewsChina nashri xabar berdi.
GAC Honda fevral oyida e’lon qilgan aksiyaga ko‘ra, model $20 ming narxda taklif etilmoqda. Bu modelning rasmiy tavsiya etilgan narxi 238 ming yuan ($34,8 ming) edi. Demak, chegirma miqdori 100 ming yuan ($14,6 ming)ni tashkil etadi. Aksiya atigi ming dona avtomobilga taalluqli bo‘lib, asosan qayta xarid qilayotgan mijozlarga mo‘ljallangan.
GAC Group ma’lumotiga ko‘ra, GAC Honda 2026-yil yanvarida atigi 4,5 mingta avtomobil sotdi. Bu o‘tgan yilning shu davriga nisbatan 69 foizga kamaygan. 2025-yil yakuni bo‘yicha esa savdo 351 ming donani tashkil etib, 25 foizga pasaygan.
Shu guruh tarkibidagi elektromobil brendi GAC Aion esa yanvarda 21,6 ming dona sotib, 171 foiz o‘sish qayd etdi. Bu ichki yonuv dvigatelli sedanlar bosimini kuchaytirayotgan NEV modellari ta’sirini ko‘rsatmoqda.
Narx pasaytirish siyosati boshqa yapon brendlarida ham kuzatilmoqda. Masalan, GAC Toyota Wildlander modeli uchun subsidiya joriy qilgan. Dongfeng Nissan esa Teana va Sylphy sedanlariga sezilarli chegirmalar e’lon qilgan.
Xitoy avtomobil dilerlari assotsiatsiyasi ma’lumotiga ko‘ra, 2026-yil yanvarida iste’mol indeksi 31,1 darajasida bo‘ldi. Bu tarixiy past ko‘rsatkichlardan biri hisoblanadi.
Eslatib o‘tamiz, Kursiv Uzbekistan nashri Honda avtomobillariga ishonch pasaygani haqida yozgan edi.
