Melaniya Tramp BMT Xavfsizlik Kengashiga raislik qiladi

AQSh prezidenti Donald Trampning rafiqasi Melaniya Tramp 2-mart kuni BMT Xavfsizlik kengashi yig‘ilishiga raislik qiladi. Bu haqda 26 fevral kuni AQShning BMTdagi doimiy vakili Mayk Uolts ma’lum qildi.

Uning aytishicha, bu AQSh raisligining birinchi kunida amalga oshadi. Bu amaldagi davlat rahbari rafiqasi ilk bor Xavfsizlik Kengashiga raislik qilishi bilan tarixiy voqea bo‘ladi.

BMT vakillari bu 15 a’zodan iborat kengash yig‘ilishiga ilk bor amaldagi dunyo yetakchisi rafiqasi raislik qilayotganini ta’kidlagan. Odatda kengashga mamlakat elchisi yoki hukumatning yuqori martabali vakili boshchilik qiladi.

Melaniya Tramp avval ham Ukrainadan Rossiyaga olib ketilgan bolalarni qaytarish masalasini ko‘targan edi. AQSh prezidenti Donald Tramp BMTni uzoq yillardan beri tanqid qilib keladi. U tashkilotni samarasiz deb atagan va islohotlar zarurligini bildirgan.

BMT ma’lumotiga ko‘ra, shu oyda AQSh tomonidan qariyb $160 mln badal to‘langan. Biroq Vashingtonning tashkilot oldidagi umumiy qarzi $4 mlrddan oshadi.

Eslatib o‘tamiz, Kursiv Uzbekistan BMT Ukrainada barqaror tinchlikni qo‘llab-quvvatlash rezolyutsiyasini qabul qilgani haqida yozgan edi.