2025-yilda O‘zbekistondagi barcha toifadagi xo‘jaliklar tomonidan jami 4 mln 160 ming 185 tonna kartoshka yetishtirildi. Bu haqda Milliy statistika qo‘mitasi xabar bermoqda.
Ta’kidlanishicha, respublika bo‘yicha kartoshka yetishtirish hajmi o‘tgan yilga nisbatan 0,2 foizga o‘sgan. Hududlar kesimida tahlil qilinganda, eng yuqori ko‘rsatkich Samarqand viloyatiga to‘g‘ri keladi. Ushbu hududda yil davomida 773 ming 598 tonna hosil yig‘ib olingan. Yetakchilar uchligidan Andijon (530 ming 666 tonna) va Farg‘ona (480 ming 007 tonna) viloyatlari ham joy olgan.
Eng kam kartoshka Toshkent shahrida (906 tonna) hamda Sirdaryo viloyatida (74 ming 871 tonna) yetishtirilgan. Shuningdek, Qoraqalpog‘iston Respublikasida 113 ming 8 tonna va Xorazm viloyatida 163 ming 175 tonna hosil qayd etilgan.
Qolgan markaziy va janubiy viloyatlar, xususan, Namangan (420 ming 348 tonna), Toshkent (415 ming 368 tonna) hamda Surxondaryo (394 ming 525 tonna) hududlarida ham barqaror hosildorlik ta’minlangan. Boshqa viloyatlardagi ko‘rsatkichlar o‘rtacha 120 mingdan 300 ming tonnagacha bo‘lgan oraliqni tashkil etgan.
Avvalroq Kursiv Uzbekistan Misr va O‘zbekiston o‘rtasida kartoshka yetishtirish bo‘yicha memorandumlar imzolangani haqida xabar bergan edi.
