BYD’ning premium brendi Denza yangilangan Z9 GT modelini 2026-yil 5-mart kuni rasman taqdim etadi. Bu haqda Xitoy sanoat va axborot texnologiyalari vazirligi ma’lumotiga tayangan holda CarNewsChina xabar berdi.
Unga ko‘ra, modelning to‘liq elektr versiyasi 1 036 kmgacha masofa bosib o‘tadi. Bu hozircha Xitoyda ommaviy ishlab chiqarilayotgan elektromobillar orasidagi eng yuqori ko‘rsatkichlardan biridir.
Taqdimot BYD’ning yangi texnologiyalariga bag‘ishlangan yirik tadbir doirasida o‘tkaziladi. Unda Blade Battery 2.0 batareyasi, DM 6.0 gibrid tizimi hamda 1 500 kVt quvvatga ega flash-charging tezkor quvvatlash tarmog‘i namoyish etilishi kutilmoqda. Shuningdek, DiPilot 300 God’s Eye 5.0 avtonom haydash tizimi ham rasman taqdim etiladi.
Yangilangan Z9 GT tom qismiga o‘rnatilgan LiDAR tizimi bilan jihozlanadi. Tashqi ko‘rinishda avtonom rejim yoqilganini bildiruvchi ko‘k indikator paydo bo‘lgan. Avtomobil uzunligi 5 195 mm, kengligi 1 990 mm, balandligi 1 500 mm, g‘ildirak bazasi esa 3 125 mmni tashkil etadi. Yangi 21 dyuymli disklar va Fjord Green rang varianti ham qo‘shilgan.
Salon dizayni uch ekranli arxitekturani saqlab qolgan. Markazda 17,3 dyuymli ekran, haydovchi va old yo‘lovchi uchun 13,2 dyuymli ikkita ekran mavjud. Uzatmalar tutqichi rul ustuniga ko‘chirilgan va yangi uch spokli rul qo‘llanilgan.
Elektr versiyada ikkita konfiguratsiya taklif etiladi: orqa yetakli 370 kVt (496 ot kuchi) va uch motorli to‘liq yetakli AWD. AWD versiyasining umumiy quvvati 850 kVt yoki 1 140 ot kuchini tashkil etadi. Bu avvalgi versiyadan 140 kVtga kuchliroq.
Z9 GT yangi 1 500 kVt quvvatlash stansiyalarida sinovdan o‘tkazilmoqda. Ular suyuqlik bilan sovitiladigan kabel tizimiga ega. Model 122,5 kVt/soat sig‘imli Blade batareyasi bilan jihozlangan. Bu quvvatlash vaqtini sezilarli darajada qisqartirishi mumkin.
Denza Z9 GT yuqori unumdor premium segmentda Zeekr 001 va Porsche Taycan bilan raqobat qiladi. 2026-yil yanvarda PHEV versiyasi 59 dona sotilgan. Biroq model 2024-yil oxirida taqdim etilganidan keyin dastlabki to‘rt oy ichida 10 mingdan ortiq yetkazib berilgan edi. PHEV versiyasi 63,82 kVt/soat batareya bilan 400 kmgacha elektr yurish zaxirasini taqdim etadi.
Eslatib o‘tamiz, avvalroq BYD Seal 07 elektromobili taqdimot arafasida rasman namoyish etilgandi. Model e-platform 3.0 Evo asosida qurilgan bo‘lib, 705 kmgacha yurish zaxirasiga ega. Rasmiy taqdimot mart oyida bo‘lib o‘tishi kutilmoqda.
