Samsung Galaxy S26 Ultra yangi flagman sifatida katta qiziqish uyg‘otmoqda. Modelning boshlang‘ich narxi $1,3 ming. Tom’s Guide nashriga ko‘ra, qurilma kuchli imkoniyatlarga ega, biroq ayrim kamchiliklari ham bor.
Quyida mazkur modelni sotib olish uchun beshta sabab va undan voz kechish uchun asosiy uchta sabab keltiriladi.
Sotib olish uchun besh sabab
Birinchi sabab bu Privacy Display. Bu funksiya ekran ma’lumotlarini begona ko‘zlardan himoya qiladi. U piksel darajasida ishlaydi va maxfiy ma’lumotlarni yashiradi. Uni tezkor sozlamalar orqali yoki tugma bosish bilan yoqish mumkin. Ayrim ilovalarda avtomatik ishga tushishi ham mumkin.
Ikkinchi sabab foydali sun’iy intellekt funksiyalari. Now Nudge suhbat mazmuniga qarab takliflar beradi. Masalan, reja haqida yozishayotgan bo‘lsangiz, kalendarni ochishni tavsiya qiladi. Circle to Search bir vaqtning o‘zida bir nechta obyektni aniqlay oladi. Gemini yordamida ovoz orqali Uber chaqirish yoki ovqat buyurtma qilish ham mumkin.
Uchinchi sabab tungi surat va video sifati yaxshilangan. 200 MP asosiy kamera va 5x optik zumli 50 MP kamera kengroq diafragma bilan jihozlangan. Samsung ma’lumotiga ko‘ra, tungi suratlar 47 foizgacha yorqinroq bo‘ladi.
To‘rtinchi sabab video uchun gorizontal barqarorlashtirish. Super Steady rejimida yangi horizontal lock funksiyasi harakat paytida ham silliq video olish imkonini beradi.
Beshinchi sabab tezroq zaryadlash. 45 Vt o‘rniga 60 Vt quvvatlash qo‘llanilgan. Qurilma 30 daqiqada 75 foizgacha zaryad olishi mumkin. Simsiz zaryadlash ham 15 Vtdan 25 Vtga oshirilgan.
Voz kechish uchun 3 sabab
Birinchi kamchilik batareya hajmi o‘zgarmagan. S26 Ultra ham 5 000 mA/soat batareya bilan keladi. Raqobatchilar esa yangi texnologiyali katta sig‘imli batareyalar taklif qilmoqda.
Ikkinchi kamchilik titan o‘rniga alyuminiy korpus ishlatilgan. Bu telefonni yengilroq qilgan, ammo ayrim foydalanuvchilar uchun mustahkamlik jihatidan orqaga qadam bo‘lishi mumkin. Rang tanlovi ham juda oddiy.
Uchinchi kamchilik Qi2 magnit tizimi yo‘q. MagSafe kabi magnitli zaryaddan foydalanish uchun alohida g‘ilof kerak bo‘ladi.
Umuman olganda, modelni Privacy Display va yangi AI funksiyalari ajratib turadi. Biroq narxi yuqori va ayrim texnik jihatlari bahsli. Katta ekranli va imkoniyatlarga boy telefon izlayotganlar uchun u jiddiy variant bo‘lishi mumkin.
Eslatib o‘tamiz, avvalroq Samsung Galaxy S24 va S23 uchun fevral yangilanishi e’lon qilingandi. Yangilanish EZB2 texnik indeksiga ega bo‘lib, hajmi taxminan 442 MBni tashkil etadi. Yangilanishning asosiy maqsadi foydalanuvchi ma’lumotlari himoyasini kuchaytirishdan iborat.
