Xitoyda Voyah brendi o‘zining mashhur miniveni — Voyah Dreamer’ning maxsus Champion Edition talqini uchun oldindan buyurtmalarni qabul qilishni boshladi. Bu haqda Autohome xabar berdi.
Yangi versiya 2026-yil mart oyida Dreamer’ning 200 minginchi nusxasi konveyerdan chiqishi munosabati bilan taqdim etilmoqda. Maxsus talqin cheklangan miqdorda ishlab chiqariladi va rasmiy narxi 319 900 yuan (taxminan $45 ming) etib belgilangan.
Champion Edition standart model o‘lchamlarini saqlab qolgan: uzunligi 5315 mm, g‘ildirak bazasi esa 3200 mm. Biroq tashqi ko‘rinishda o‘ziga xos uslub qo‘llanilgan — kuzov to‘liq qora rangda bo‘lib, obsidian qora tusidagi yirik radiator panjarasi bilan uyg‘unlashtirilgan.
Modelning asosiy ustunligi — zamonaviy elektron tizimlar. Avtomobil Huawei’ning ilg‘or ishlanmalari bilan jihozlangan: Qiankun ADS 4.0 aqlli haydash tizimi hamda HarmonyOS Cockpit 5 multimedia platformasi o‘rnatilgan. Bu tizimlar xavfsizlik, yarim avtonom boshqaruv va raqamli qulaylikni yangi bosqichga olib chiqadi.
Texnik jihatdan miniven zamonaviy platformaga qurilgan bo‘lib, old tomonda ikki qo‘shaloq ko‘ndalang richagli, orqa tomonda esa besh richagli mustaqil osma tizimga ega. Gibrid kuch qurilmasi 41,7 kVt·soat sig‘imli tortish batareyasi bilan ta’minlangan. CLTC sikliga ko‘ra, avtomobil faqat elektr rejimida 235 kilometrgacha yo‘l bosishi mumkin. Uzatma tizimi — to‘liq yuritma.
Avvalroq Kursiv Uzbekistan Voyah Passion L avtomobili Xitoyda sotuvga chiqqani haqida yozgandi.
