Eron hududida AQSh va Isroil tomonidan amalga oshirilayotgan zarbalar fonida halok bo‘lganlar soni 555 nafarga yetdi. Bu haqda Eron Qizil Yarim Oy Jamiyati ma’lum qilgan, deb yozmoqda Al Jazeera nashri.
2-mart tongida janubdagi Fors viloyatida kamida 35 kishi halok bo‘lgani xabar qilindi. Tehrondagi Niloofar maydoniga berilgan zarbada esa 20 dan ortiq odam qurbon bo‘lgan. Shuningdek, markaziy Sanandaj shahrida turar-joy binolari vayron qilingani, kamida ikki kishi halok bo‘lgani aytilmoqda.
Eronning Atom energiyasi bo‘yicha xalqaro agentlikdagi elchisi International Atomic Energy Agency (IAEA) huzurida bayonot berib, 1-mart kungi zarbalar Eronning Natanz yadroviy ob’ektiga qaratilganini ma’lum qildi. Tehron ushbu inshoot tinch maqsadlarda foydalanilishini ta’kidlab, yadroviy qurol ishlab chiqish haqidagi da’volarni rad etdi. AQSh va Isroil esa hozircha Natanz bo‘yicha rasmiy tasdiq bermagan.
Mahalliy manbalarga ko‘ra, Minab shahridagi qizlar maktabiga berilgan zarbada halok bo‘lganlar soni 180 nafarga yetgan. Tehrondagi Gandhi shifoxonasi ham raketa hujumi oqibatida jiddiy zarar ko‘rgan, bemorlar evakuatsiya qilingan. Shuningdek, poytaxtdagi tez tibbiy yordam xizmati binosi ham zararlangan, bir necha xodim jarohat olgan.
Isroil tomoni Eron tomonidan yangi raketa zarbalari amalga oshirilganini ma’lum qildi. Markaziy Beit Shemesh shahriga tushgan raketa oqibatida to‘qqiz kishi halok bo‘lgan, yana o‘nlab odam bedarak yo‘qolgan.
Shu bilan birga, Eron AQSh harbiy obyektlari joylashgan Fors ko‘rfazi mamlakatlari — Qatar, Bahrayn, Jordan, Oman, Kuvayt, Saudiya Arabistoni va BBA hududlariga ham javob zarbalari bergani xabar qilinmoqda. Ayrim aeroportlar, mehmonxonalar va turar-joy binolari nishonga olingan.
Mintaqadagi vaziyat keskinlashib borar ekan, Fors ko‘rfazi davlatlari o‘z hududini himoya qilishga tayyorligini bildirgan. Eron tashqi ishlar vaziri esa Tehron qo‘shni davlatlar bilan to‘qnashuv istamasligini, asosiy nishon AQSh harbiy infratuzilmasi ekanini ta’kidladi.
Avvalroq Kursiv Uzbekistan Pokistonda uch kunlik komendantlik soati joriy etilgani haqida yozgandi.
